DILI, 19 abril 2022 (TATOLI) – Kandidatu Prezidente repúblika, José Ramos Horta, provizoriamente, nafatin lidera númeru votu husi rezultadu apuramentu eleisaun prezidensiál segunda volta.
Ramos Horta lidera provizória ho 61.56% husi totál votante 9.569 iha tuku 22:00 oras Timor-Leste. Enkuantu, Francisco Guterres ‘Lú Olo’ ho totál votante 57.187 (38,44%), husi munisípiu 12 no Rejiaun autónoma espesiál Oe-cusse Ambeno (RAEOA).
Rezultadu atualizasaun dadus iha edifísiu Sekretariadu tékniku administrasaun eleitorál (STAE), Ajénsia TATOLI observa katak iha tuku 22h30 kalan ne’e, provizoriamente, hatudu katak kandidatu prezidente repúblika ho sorteiu númeru ida (1), José Ramos mak kontinua lidera kompara ho kandidatu ho sorteiu númeru rua (2), Francisco Guterres, ‘Lú Olo’. Katak, Ramos Horta lidera ho 61,56% no ‘Lú Olo’ ho 38,44% husi totál votante.
Dadus ne’ebé TATOLI – ajénsia informasaun ofisiál Estadu, asesu, totál Ata ne’ebé iha hamutuk 1.200, husi númeru ne’e totál Ata dizita ona hamutuk 406 no Ata 794 seidauk dizita ka sei iha prosesu.
Totál votu nulu 1.434, votu rezeitadu ualu (8), votu branco 392, totál votu reklamandu 63 no votu abandonadu hitu (7).
Tuir dadus informasaun eleitór sira hatudu katak totál votante rejistadu hamutuk 859.925, (100.00%). Partisipasaun 197,011 (22.91) kompostu husi Mane 101,346 (51.44%) no Feto 95,665 (48.56%). La tuir Vota 0%.
Prosesu kontajen votu husi totál sentru votasaun 1.200 iha territóriu laran inklui diaspora sei kontinua prosesa.
Jornalista: José Belarmino De Sá
Editór: Rafy Belo
