Top

Virgílio Guterres hala’o hikas knar hanesan Prezidente CI

Prezidente CI, Virgílio da Silva Guterres. Imajen Tatoli/Egas Cristovao

DILI, 25 abríl 2022 (TATOLI)—Prezidente Conselho de Imprensa (CI), Virgílio da Silva Guterres, segunda ne’e, hala’o hikas nia knar hanesan Prezidente Conselho de Imprensa CI, hafoin indika konsilleiru Expedito Dias Ximenes asume prezidente interinu CI hahú hosi 24 janeiru to’o 24 abríl 2022. 

Notísia Relevante: Virgílio Guterres hatudu Expedito Dias lidera CI sai Prezidente Interinu

“Ohin, loron 25 abríl 2022, loron liberdade ninian ne’ebé Timor mós hetan, nune’e ha’u hahú fali asume ha’u-nian kargu hanesan Prezidente Conselho de Imprensa,” Virgílio da Silva Guterres hateten ba jornalista sira liuhosi konferénsia imprensa, iha salaun CI Quintal Boot, Dili.

Ida-ne’e hanesan tradisaun ida ne’ebé Conselho de Imprensa halo tanba uluk atu pronunsia kandidatura ba Prezidente repúblika no halo kampaña mós, halo konferénsia imprensa ida hodi hateten ba públiku katak Prezidente CI dispensadu.

“Nune’e, agora mai fali atu retoma fali kargu, ha’u tenke hato’o ba públiku katak atividade ne’ebé hahú iha loron 24 fevereiru to’o agora ramata ona no ohin ha’u halo knaar hanesan Prezidente CI,” nia dehan.

Virgílio Guterres apresia no agradese Konseleiru CI, Expedito Dias Ximenes, ne’ebé durante fulan tolu halo knar hanesan Prezidente Interinu CI hodi dirije plenária iha CI inklui tau-matan mós ba mídia nia kobertura durante eleisaun prezidensiál 2022.

“Ha’u fó apresiasaun ba Konseleiru Expedito Dias Ximenes ne’ebé asume responsabilidade boot hodi kontinua tau-matan no preside plenária sira liu-liu períodu eleisaun prezidensiál nian,” nia dehan.

Konsilleiru Conselho de Imprensa (CI), Expedito Dais Ximenes hateten, hahú hosi loron ohin (segunda, 25/04) hahú halo fali nia knar hanesan Konsilleiru Conselho de Imprensa.

“Ohin, ha’u entrega fali knar ba Prezidente CI no ha’u halo knar hanesan baibain,” nia dehan.

Durante períodu eleisaun prezidensiál 2022, nia agradese ba komunikasaun sosiál sira ne’ebé hatudu duni sira-nia imparsialidade, neutralidade no apresia ba mídia nia kobertura durante kampaña eleittorál hahú hosi primeira volta to’o segunda volta no to’o eleisaun ramata.

“Hakarak agradese ba mídia ein jerál, durante fulan tolu nia-laran, kolega sira halo servisu ho di’ak no hatudu duni imparsialidade iha eleisaun prezidensiál 2022 nian,” nia dehan.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!