Janeiru too marsu, pasiente TB 33 halo tratamentu saude iha Klinika Tibar
TIBAR, 29 abril 2022 (TATOLI)— Koordenadór Servisu Internamentu Klibur Domin Tibar, Ezau da Costa do Rego hateten, hahú husi fulan janeiru too marsu 2022, pasiente tuberkuloze (TB) 33 mak halo ona tratamentu saude iha klinika Klibur Domin Tibar.
“Husi janeiru too marsu 2022, pasiente TB ne’ebé mak halo tratamentu saude iha 33. Husi númeru ne’e mane 20 no feto 13. Sira na’in 33 ne’e agora dadaun tama ona iha tratamentu faze kontinuasaun. Ita hatene katak tratamentu ba tuberkoloze ne’e iha faze rua. Faze dahuluk konsulta intensivu fulan rua no faze kontinuasaun konsulta fulan haat hodi kompleta fulan neen,” Koordenadór Ezau da Costa dehan ba jornalista sira iha Klinika Klibur Domin Tibar, ohin.
Nia hateten, agora daudaun pasiente balun iha faze tratamentu kontinuasaun no barak fila ona ba uma no balun ne’ebe halao tratamentu iha fulan abril sei kontiua tan.
“Agora daudaun pasiente sira ne’ebé kontinua tratamentu nafatin sei iha 30, kompostu mane 16 no feto 14. Sira halo tratamentu kontinuasaun iha klinika ne’e bainhira remata faze intensivu no sei fila ba sira-nia uma. Depois sira ba iha fasilidade saúde ne’ebé mak besik hodi kontinua kompleta sira-nia tratamentu ba fulan neen,” Ezau da Costa do Rego informa.
Nune’e nia informa, pasiente sira ne’ebé mak halo tratamentu iha ne’e maioria mai husi munisípiu 12 inklui RAEOA. Pasiente TB balun mos mai husi Óspital Nasional Guido Valadares (HNGV).
“Ekipa programa TB mos tun ba sentru saúde no postu saúde sira ba halo promosaun no screnning, kuandu iha pasiente balun detekta mak sei iha sintomas TB, sei haruka halo tratamentu saude iha Klinika ne’e,” nia hatete.
Nia esplika, iha tinan 2021 pasiente TB ne’ebe rekuperadu iha 1.000 resin. Durante ne’e pesoál saúde na’in sia mak fó tratamentu ba sira hanesan enfermeiru, no mediku husi ministériu saúde, hodi tau atensaun ba pasiente sira ne’e. Kona-ba aimoruk ba TB rasik ita la iha problema tanba daudaun ne’e ita nia aimoruk sufisiente ,” Ezau hateten.
Jornalista : Felicidade Ximenes
Editóra : Armandina Moniz
