Hadau rai, difikulta prosesu reabilitasaun eskola

DILI, 05 maiu 2022 (TATOLI) – Problema hadau malu rai no rai monu difikulta prosesu reabilitasaun Eskola Ensinu Báziku Filiál (EBF) rua iha Munisípiu Bobonaro no Ermera.

Liafuan ne’e fo sai husi  Ministru Edukasaun Juventude no Desportu (MEJD), Armindo Maia ba Tatoli iha Ministériu Edukasaun, Vila Verde, kinta ne’e.

“Ha’u hakarak dehan daudaun ne’e ita iha dadus totál eskola hamutuk 203 mak tama iha planu projetu komunitária atu hetan reabilitasaun no konstrusaun. Maibe, iha eskola rua maka hasoru difikuldade tanba sei iha hela problema hadau malu rai no rai monu,” dehan Ministru Armindo.

Nia dehan, eskola  EBF rua ne’e mak hanesan Eskola Hauba iha Munisípiu Bobonaro infrenta problema hadau malu rai. Parte seluk,  EBF ida iha Atsabe, Ermera, labele kontinua reabilitasaun tanba rai monu.

Maibé Ministru ne’e hateten, prosesu konstrusaun no reabilitasaun ba eskola sira balun atraza, mais nia garante katak to’o fulan juñu prosesu sira ne’e  tenke atinje ona 50%. Tanba daudaun ne’e kuaze orsamentu hotu aloka ba konta bankária grupu komunitária ida-idak nian.

Parte seluk, konaba materiál konstrusaun no reabilitasaun ba projetu komunitária ba eskola 203 iha territóriu nasionál ne’e, tuir membru governu ne’e katak iha duni kualidade tanba materiál sira ne’e molok atu sosa  sei lori ba halo teste   iha laboratóriu hodi hatene ninia kualidade. Ne’e duni prosesu ba eskola 203 ne’e sei finaliza iha setembru ou outubru tinan ne’e.

Entretantu totál orsamentu ne’ebé aloka ba prosesu konstrusaun no reabilitasaun ba eskola 203 iha territóriu nasionál hamutuk $20.274.586,97.

Jornalista: Tomé Amado

Editóra    : Armandina Moniz