BAUCAU, 09 maiu 2022 (TATOLI) – Komunidade uma-kain sia hosi suku Bahú, postu admistrativu Baucau vila, munisípiu Baucau sai benefisiáriu hodi hetan apoia subsídiu konstrusaun Uma Kbiit Laek (UKL) iha tinan ne’e.
Xefe suku Bahú, Manuel Francisco Rodrigues Gusmão hateten, liuhosi inkontru konsellu suku deside benefisiáriu na’in-sia ne’ebé prienxe kritéria atu hetan subsidiu UKL ba tinan 2022.
Benefisiariu na’in-sia ne’e mai hosi aldeia tolu ne’ebé kada aldeia sei hetan uma tolu kompostu aldeia Ana-Ulo, Ro-Ulo no Boile.
“Ami harii ekipa verifikadór kompostu hosi ha’u rasik, Ofisial Polísia Suku (OPS), veteranu, xefe aldeia no relijiozu sira hamutuk na’in-ualu envolve mós PNDS munisípiu deside katak benefisiáriu sira merese duni simu ajuda hosi estadu,” Xefi Suku Bahú informa ba Agéncia Tatoli iha Vila Antiga, segunda ne’e.
Hosi benefisiáriu nain-sia ne’e iha direitu ba UKL ho medida 48 metru kuadradu ne’ebé sei aloka orsamentu ba kada uma hamutuk $17.000.
Nune’e, alokasaun orsamentu hosi programa UKL ba suku Bahú hamutuk rihun $159,318 ne’ebé sei finansia ba infraestrutura hamutuk rihun $153,306 no operasionál rihun $6,012.
Entretantu, suku Bahú kompostu hosi aldea lima hanesan Ana-Ulo, Ro-ulo, Boi-lé, Makadae no Lamegua ho tótal populasaun hamutuk 11.562.
Jornalista : Natalino Belo
Editór : Evaristo Soares Martins
