Bainaka espesiál 14 sei partisipa serimónia investidura PR eleitu

DILI, 16 maiu 2022 (TATOLI)–Ministra Negósiu Estrajeiru no Kooperasaun (MENK), Adaljiza Albertina Xavier Reis Magno, informa bainaka espesiál konfrimadu hamutuk 14 mak sei partisipa iha serimónia investidura Prezidente Repúblika eleitu períodu 2022-2027, José Ramos Horta, iha 19 maiu 2022.
“Komunidade high level ne’ebé konfirmadu iha na’in 14, high level quer dizer sira-ne’ebé mak responde konvite hosi sua exelénsia Prezidente Repúblika ho sua exelénsia Preimeiru Ministru, ne’ebé mak konfirmadu mak Prezidente Repúblika Portugál ho Governadór Jerál, Prezidente Asembleia Nasionál São Tome, Primeiru Ministru Guiné Bissau, Vise-Prezidente Asembleia Repúblika Portugál, Ministru Koordenadór ba Assuntos Políticos, Jurídicos e de Segurança hosi Indonézia,” Governante be’e informa ba jornalista sira, hafoin reuniaun extraordináriu Konsellu Ministru, iha Palásiu Governu, segunda ne’e.
Hosi Cabo Verde mak Ministra Prezidénsia Konselu Ministru, hosi g7+ mak Ministra Sieraleon, Singaputa nian mak Ministru Gabinete do Primeiro Ministro ba Asuntu Negósiu Estrajeiru no Eduksaun, hosi Mosambique mak Ministro na Casa Civil na Presidencia República ne’ebé enviadu prisipál hosi PR.
Hosi Japaun mak enviadu espesiál ba Primeiru-Ministru nian mak Vise-Prezidente Parlamentu no Ministru Negósiu Estranjeiru nian, Sekretáriu Ezekutivu Comunidade Paises da Lingua Portuguesa (CPLP), Zacarias Albano da Silva, no Ángola no Brasil mak enviadu espesiál hosi Prezidente Repúblika maibé ne’e iha level embaixadór.
Nia dehan, embaixadór hamutuk 33 maibé non rezident katak embaixadór ne’ebé mak akreditasu mai Timor maibé hela iha Austrália, Indonézia, Singapura no Malázia ne’e aproveita okaziaun ne’e sei mai hotu.
“Entaun embaixadór hamutuk 33, bainaka espesiál konfrimadu hamutuk 14 no bainaka Prezidente Repúblika eleitu mós barak,” nia dehan.
Governante ne’e informa, bainaka sira-ne’e maiória sei to’o iha Timor-Leste iha loron 18 no 19 maiu 2022.
Governu Garante Otél ba bainaka internasionál
Entretantu Sekretáriu Jerál Komisaun Organizadora, Manuel Soares Tilman, hateten Governu prepara fatin liu-liu prepara otél ba bainaka internasionál sira-ne’ebé atu partisipa iha serimónia investidura ne’e sufisiente ona.
“Ita-nia Governu garante no sufisiente otél iha sidade Dili ba ita-nia konvidadu Internasionál, mezmu númeru konvite besik 200,” Manuel Soares Tilman hateten.
Responsável ne’e informa, Governu prepara otél lima iha kapitál Dili ba bainaka espesiál sira-ne’e mak hanesan Hotel Timor Plaza, Hotel Timor, Hotel Novo Turismo no rua seluk tan.
“Ita-nia Otél lima ne’e ita sei aluga tan Palásiu Nobre ho Ministériu Fnanasa nian iha Igreja Motael nia sorin,” nia dehan.
Atuál Diretór Jerál Arquivo ne’e hateten, parte Komisaun Organizadora enkontru ona ho na’in ba Otél iha Dili katak, karik iha ema ruma ne’ebé booking ona sira-nia Otél fulan ida rua antes entaun haruka muda tiha fatin seluk, nune’e bainaka espesiál hanesan Xefe Estadu no Xefe Governu bele uza.
“Ita halo enkontru ho ita-nia Otél boboot iha Dili atu identifika ema ne’ebé booking fulan ida-rua antes, karik sitausaun ladi’ak Governu sei muda ba sira-nia fatin,” nia esplika.
Antes ne’e, Vise Ministru Administrasaun Estatál (MAE), Lino de Jesus Torrezão, informa ba serimónia toma pose ne’e Governu aloka orsamentu millaun $1,6 hodi fasilita atividade isar bandeira ne’ebé sei realiza iha 20 maiu 2022.
“Ba tomada pose ida-ne’e ami tau osan milla $1,6 no ba isar bandeira iha komemorasaun loron restaurasaun independénsia Timor-Leste ba dala-2022, 20 maiu ne’e, ho osan hamutuk $400,000,” Lino hateten.
Jornalista : Osória Marques
Editór : Cancio Ximenes

