iklan

DILI

CNE sei submete lista subvensaun kandidatu PR na’in-16 ba Ministériu Finansa

CNE sei submete lista subvensaun kandidatu PR na’in-16 ba Ministériu Finansa

Prezidente Komisaun Nasionál Eleisaun (CNE), José Agostinho da Costa Belo. Imajen Tatoli /Egas Cristovão.

DILI, 27 juñu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, informa CNE sei submete lista subvensaun kandidatu Prezidente Repúblika (PR) períodu 2022-2027 hamutuk na’in-16 ba Ministériu Finansa (MF) hodi prosesa no halo pagamentu.

Notísia Relevante: Kandidatu PR na’in-16 sei simu subvensaun $4 kada votu

“Ha’u hanoin subvensaun ba eis kandidatu Prezidente Repúblika 2022-2027 ita prosesa hela no tuir lei bainhira lei dehan hotu-hotu iha direitu. Ita la’o tuir ida-ne’e no la haree ba nia boot ka kiik. Tanba, sira-ne’ebé la manán hotu-hotu hetan subvensaun, ne’ebé hateten katak kada votu hetan $4 ne’e, ita agora prosesa daudaun. Ita prepara ona atu haruka ba Ministériu Finansa oinsá atu halo pagamentu,” Prezidente CNE ne’e hateten ba jornalista sira, hafoin hala’o enkontru ho Xefe Estadu iha Palásiu Prezidensiál Nicolau Lobato, Bairru Pite, Dili, segunda ne’e.

Nia hatutan, orsamentu ne’e depende ba nia votu maibé kandidatu hotu-hotu sei hetan dolar haat (4) kada votu.

“Orsamentu depende votu ne’ebé sira hetan tanba ne’e tékniku liu ita sei haree atu sira ne’ebé manán votu barak liu, sira iha direitu boot liu, no sira ne’ebé manán uitoan sei hetan uiouan. Ne’ebé, ha’u hanoin ne’e normál tanba lei dehan $4 kada votu,” nia hateten.

Entretarnu Prezidente Repúblika, José Ramos Horta hetan votu 387,145 sei hetan subvensaun hamutuk $1,548,58; Prezidente Repúblika sesante, Francisco Guterres “Lú Olo” ho votu 242,440 sei hetan subvensaun $969,760; Atuál Ministra Solidariedade Sosiál no Inkluzaun (MSSI) Armanda Berta dos Santos ho votu 42,315 sei hetan totál subvensaun $169,260; Mariano Assanami Sabino Lopes ho votu 33,550 ho totál subvensaun $134,200; Eis Tenente Jenerál, F-FDTL, Tito da Costa Cristovão ‘Lere Anan Timur’ ho votu 31,640 ho nia totál subvensaun $126,560.

Kandidatu Prezidente Repúblika, Anacleto Bento Perreira ho votu 9,702 sei hetan subvensaun ho nia totál $38,808; kandidatu PR Martinho da Silva Gusmão ho votu 6,373 ho totál subvensaun $25,492; Hermes da Rosa Correia Barros ho votu 5,256 ho totál subvensaun hamutuk $21,024.

Kandidatu PR Isabel da Costa Ferreira ho votu 3,019 ne’e sei simu subvensaun ho totál $12,076; Maria Helena de Jesus Lopes Pires ho votu 2,950 ho totál subvensaun $11,800; Felizberto Araújo Duarte ho votu 1,989 ho totál $7,956.

Kandidatu Constancio da Conceição Pinto ho votu 1,831 ne’ebé sei simu subvensaun ho totál $7,324; Rogério Tiago F. Lobato ho votu 1,583 sei simu subvensaun ho totál $6,332; Antero Benedito da Silva ho votu 1,120 ho totál subvensaun $4,480; Virgílio da Silva Guterres ho votu 1,088 ho totál subvensaun $4,352 no Maria Angela Freitas da Silva ho votu 533 ho totál subvensaun hamutuk $2,132.

Tuir dekretu-lei númeru 6/2018, 14 marsu, kona-ba fixa valór subvensaun hosi Estadu ba kandidatu Prezidénsia Repúblika ba kampaña eleitorál, iha artigu 2 kona-ba ‘valór subvensaun’, iha pontu 1 hateten kada kandidatu prezensiál iha direitu atu simu subvensaun Estadu, ba kampaña eleitorál ho valór $4 ba kada votu ne’ebé hetan.

Iha pontu 2 haktuir, kálkulu valór totál subvensaun ne’ebé Estadu fó ba kada kandidatu prezensiál, bazea ba númeru totál votu ne’ebé hetan, sei realiza ho baze ba akordaun judisiál válida ba votasaun dahuluk no proklama rezultadu eleitorál iha termu nú. 1 artigu 48 Lei nú. 7/2006, 28 dezembru, bazea ba redasaun Lei nú. 4/2017, 23 fevereiru.

Iha artigu 3 iha dekretu-lei hanesan, kona-ba ‘pagamentu subvensaun’, valór subvensaun ne’ebé previstu iha artigu anteriór, sei selu ba kada kandidatu prezensiál to’o loron 30 hafoin publikasaun Jornál Repúblika, bazea ba akordaun judisiál hosi artigu anteriór.

Notísia Relevante: CNE : “Se segunda volta kandidatu nafatin hetan subvensaun”

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!