iklan

MUNISÍPIU, NASIONÁL, SAÚDE

SAMES distribui aimoruk dexamethasone-simvastatin tablet 245.000 ba fasilidade saúde-sira

SAMES distribui aimoruk dexamethasone-simvastatin tablet 245.000 ba fasilidade saúde-sira

Aimoruk Dexamethasone tablet hosi India.Imajen/Espesial

DILI, 23 juñu 2022 (TATOLI)— Servisu Autónomu Medikamentu no Ekipametu Saúde (SAMES), hahú hosi tinan 2019 too 2021, konsege distribui aimoruk dexamethasone no simvastatin tablet hamutuk 245.0000, ne’ebé laiha kualidade ba fasilidade saúde iha territóriu nasionál.

Hosi totál tablet 245.000, kompostu hosi aimoruk dexamethasone ho tablet hamutuk 25.000 no simvastatin  tablet hamutuk 220.000.

Notísia relevante: Laiha kualidade, MS apela labele fó aimoruk “dexamethasone no simvastatin” ba pasiente

Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins. Imajen Tatoli/Francisco Sony.

“Iha tinan 2021, ita sosa aimoruk sinvastatin tablet hamutuk 360.000, ne’ebé konsege distribui ba fasilidade saúde iha territóriu nasionál hamutuk tablet 220.000. Nune’e restu tablet hamutuk 140.000 mak agora iha armazein SAMES, no halo ona suspensaun distribui tanba laiha kualidade,” Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins informa ba Agência TATOLI iha nia knaaar fatin-Kampu Alór-Dili, foin lalais ne’e.

Diretór Santana, informa kona-ba aimoruk dexamethasone tablet hamutuk 25.000 ne’e, konsege distribui hotu ba fasilidade saúde iha territóriu nasionál.

“Aimoruk dexamethasone ita sosa iha tinan 2019, maibé aimoruk ne’e too iha Timor Leste iha fulan marsu 2020 ho tablet hamutuk 25.000.  Nune’e ita konsege halo distribuisaun ba fasilidade saúde sira hotu. Tanba ne’e aimoruk ne’e nia-estoke iha armazein laiha ona,” nia akresenta.

Maski, nune’e responsavél ne’e la sita totál orsamentu hirak mak konsege gasta ba sosa aimoruk tipu rua ne’ebé laiha kualidade ne’e hosi nasaun Índia.

Diretór ne’e dehan hato’o ona relatóriu ba Ministra Saúde, maibé to’o oras ne’e seidauk iha orientasaun ruma ba fasilidade saúde atu rekolla aimoruk tipu rua ne’ebé laiha kualidade.

“Ami informa verbalmente liuhosi mídia sosiál hanesan WhatsApp no Facebook ba fasilidade saúde atu suspende no labele fó ba pasiente atu konsumu. Husu atu rai iha nia fatin to’o iha orientasaun mak tun ba rekolla hodi halo destruisaun,” nia afirma.

Sentru Saúde Comoro. Imajen Tatoli/Egas Cristovão.

Iha fatin ketak, Xefe Sentru Saúde Comoro, Emelia Sousa, hateten too oras seidauk simu pedidu hosi Servisu Saúde Munisípiu Dili atu suspende aimoruk dexamethasone no simvastatin ne’ebé laiha kualidade.

“Ami simu duni aimoruk ne’e hosi SAMES, maibé ha’u seidauk hatene loos informasaun kona-ba suspensaun aimoruk tipu rua ne’e hodi fó ba pasiente sira,” nia afirma

Nia hatutan “Aimoruk ne’e ami  estoke  iha hela, maibé karta seidauk to’o iha ami nia liman kona-ba atu suspende aimoruk.  Maibé karik tempu badak ami simu pedidu ami sei la fó ba pasiente sira atu konsumu”.

Notísia relevante: MS suspende distribuisaun aimoruk “dexamethasone no simvastatin” ba fasilidade saúde

Jornalista : Felicidade Ximenes

Editór       : Florencio Miranda Ximenes

iklan
iklan

Leave a Reply

iklan
error: Content is protected !!