iklan

DILI

SEII sei buka dalan asegura feto timoroan na’in-hitu “terus” iha Dubai

SEII sei buka dalan asegura feto timoroan na’in-hitu “terus” iha Dubai

Sekretária Estadu ba Igualdade no Inkluzaun (SEII), Maria do Rosário Fátima Correia. Imajen Tatoli/Francisco Sony.

DILI, 28 juñu 2022 (TATOLI)—Sekretária Estadu Igualdade Inkluzaun (SEII), Maria dos Rosário Fátima Correia, hateten SEII sei buka dalan hodi asegura traballadór feto timoroan na’in-hitu ne’ebé ho intensaun atu ba servisu maibé agora “terus” hela iha Dubai.

Notísia Relevante: MNEK koopera ho INTERPOL salva traballadora timoroan na’in-hitu “terus” iha Dubai

“SEII sei servisu hamutuk ho Ministériu Negósiu Estranjeiru no Kooperasaun (MNEK) hodi buka dalan atu asegura sira,” Maria dos Rosário Fátima Correia hateten ba Agência TATOLI, hafoin reuniaun komité diretiva Spot Light tinan 2022 nian, iha Novo Turismo, Dili, tersa ne’e.

Governante ne’e hatutan, ida-ne’e MNEK mak haree kestaun refere tanba MNEK mak iha kompeténsia atu haree kazu ne’e hafoin informa mai Governu, maibé ida-ne’e nafatin iha SEII nia responsabilidade hamutuk ho parte relevante atu konfirma.

Tanba, nia dehan, SEII nia papel mak atu halo advokásia ba feto no labarik feto sira maibé kontinua servisu hamutuk ho ministériu relevante, nune’e buka hatene paradeiru kolega feto sira-ne’e to’o iha ne’ebé ona.

Husu kona-ba SEII nia esforsu atu lori fila traballadór feto na’in-hitu mai Timor-Leste, nia hatán, nia parte sei halo esforsu hodis ervisu hamutuk ho MNEK tanba ema mak sai sentru ba dezenvolvimentu.

“Depende mekanizmu ne’ebé ita halo maibé hanesan ha’u dehan ema mak sentru ba dezenvolvimentu entaun ita lakohi ita-nia ema iha kotuk, tanba ne’e SEII sei halo esforsu nafatin,” nia esplika.

Entretantu, Embaixadora Advokásia no Kampaña Impaktu Negativu hosi Kaben Sedu no Isin-rua Sedu no mós Hapara Violénsia hasoru Feto no Labarik feto iha Timor-Leste, Cidália Lopes Nobre Guterres, hateten hamutuk hodi kombate violénsia hasoru feto no labarik feto iha Timor-Leste no labele husik ema ida iha kotuk.

“Mai ita hateten lae ba kualker tipu violénsia bazea ba jéneru tanba nu’udar sidadaun ita hotu iha obrigasaun atu harii mundu seguru, atu nune’e ita hotu bele moris hakmatek no partisipa ativa iha prosesu dezenvolvimentu nasionál,” nia hateten.

Notísia Relevante: Governu sei solusiona traballadór timoroan na’in-hitu “terus” hela iha Dubai

PR Horta husu Governu repatria timor-oan na’in-hitu hosi Dubai

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!