BOBONARO, 29 juñu 2022 (TATOLI) – Servisu Saúde Munisípiu Bobonaro, la hetan distribuisaun hosi Servisu Autónomu Medikamentu Ekipamentu Saúde (SAMES) kona-bá aimoruk tipu rua ne’ebé Ministériu Saúde (MS) suspende atu fó ba pasiente sira konsumu.
Purtantu ai-moruk tipu rua ne’ebé iha loron 20 fulan-juñu tinan 2022, Ministériu Saúde deside suspende ne’e mak hanesan Dexametasona no Simvastatina tanba laiha kualidade, hafoin halo teste iha laboratóriu Therapeutic Good Administration (TGA) Austrália.
Notísia relevante:MS suspende distribuisaun aimoruk “Dexametasona no simvastatin” ba fasilidade saúde
“Ai-moruk rua ne’ebé hanesan Dexametasona ho Simvastatina la kualidade ho númeru boot ne’ebé Ministériu Saúde suspende, Bobonaro la hetan distribuisaun, ne’ebé laiha problema,” Diretór Servisu Saúde Munisípiu Bobonaro, João Barreto Cardoso, informa ba Agência Tatoli, kuarta ne’e.
Enkuantu ai-moruk ne’e sosa hosi nasaun Índia no hahú 2019 mai to’o 2021, SAMES disribui ona ba fasilidade saúde iha territóriu nasionál hamutuk tablet 245,000 komposta hosi Dexametasona tablet 25.00 no Simvastatina hamutuk tablet 220,000, falta tablet 140 mak sei iha hela armazein Kampung Alor, Dili.
“Agora ita iha ai-moruk ida ho númeru boot seluk kualidade di’ak mak iha-ne’e mak durante ne’e distribui ba pasiente sira iha fasilídade saúde sira hotu iha munisípiu Bobonaro, kona-bá ai-moruk laiha kualidade ita la fó ba pasiente sira,” nia hateten.
Notísia relevante: MS presiza teste kualidade ai-moruk molok distribui ba sentru saúde sira
Jornalista : Sérgio da Cruz
Editór : Evaristo Soares Martins
