Educating The Future iha kompromisu apoiu konstrusaun pre-eskolár iha TL
DILI, 05 jullu 2022 (TATOLI)—Prezidente Repúblika (PR), José Ramos Horta, tersa ne’e, simu audénsia ho Fundadór Organizasaun Educating The Future, Adam Hegedus, ho ekipa hodi rona atividade sira-ne’ebé hala’o durante ne’e liu-liu empodera edukasaun pre-eskolár iha Timor-Leste.
“Ami-nia vizaun no misaun mak atu empodera edukasaun pre-eskolár iha Timor-Leste liu-liu ba labarik sira hodi konstrui edifisiu ba pre-eskolár ne’e rasik tanba haree ba labarik sira 60% iha Timor laran ladún asesu ba pre-eskolár,” Fundadór Organizasaun Educating The Future, Adam Hegedus, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, tersa ne’e.
Nia dehan, ho razaun ida-ne’e mak organizasaun ne’e foku ba edukasaun pre-eskolár atu nune’e bele ajuda labarik sira asesu edukasaun.
Aleinde enkoraja estudante sira kona-ba importánsia hosi pre-eskolár tanba edukasaun pre-eskolár hanesan edukasaun ida-ne’ebé bázika oinsá atu forma labarik sira-nia karátér no mentalidade, tan ne’e nu’udar parte ida esensiál liu ba dezenvolvimentu integradu labarik sira nian.
“Programa ami halo pre-eskolár iha munisípiu hotu iha Timor-Leste no daudaun halo iha Aileu, Baucau, Ermera no Liquiça maibé ami hakarak halo pre-eskolár iha munisípiu hotu ho totál 350,” nia dehan.
Organizsaun Educating The Future servisu hamutuk ho Ministéiru Edukasaun Juventude no Desportu (MEJD) no autoridade munisípiu sira hodi identifika fatin no foku mak atu hadi’a edifísiu pre-eskolár ne’ebé presiza tebes atu reabilita no servisu hamutuk ho dirasaun.
Tuir estimasaun sei halo kada pre-eskolar ho sala rua ba estudante sira no ida ba profesór sira, ho orsamentu tuir estimasaun ne’ebé iha mak kada eskola rihun $45 to’o rihun $50 ne’ebé inklui ona eletrisidade, fasilidade ba manorin sira, estudante no fasilidade adisionál seluk ba jardin.
Nune’e, ekipa sei ba hala’o identifikasaun no sensibilizasaun ba kada munisípiu hotu hodi halo selesaun ba pre-eskolár sira-ne’ebé presiza urjente tebes atu halo reabilitasaun no harii edifisiu foun.
“Planu iha tinan oin sei halo edifísiu foun 20. Ba orsamentu ami sei enkontru ho parseiru sira iha Austrália inklui mós ho Governu Austrália rasik kona-ba orsamentu ne’ebé presiza,” nia dehan.
Dadaun ne’e, sira-nia parte finaliza ona konstrusaun pre-eskolar ida iha suku Tibar, postu administrativu Bazartete, munisípiu Liquiça ne’ebé tuir planu se inagura iha loron 12 fulan-jullu tinan 2022.
Enkuantu, iha sorumutu ne’e Prezidente Repúblika, José Ramos Horta, louva no fó apoiu ba servisu Organizasaun Educating the Future hodi kontribui ba dezenvolvimentu nasaun iha área edukasaun pre-eskolár ba labarik.
Jornalista : Nelson de Sousa
Editór : Cancio Ximenes
