TL ho Indonézia kontinua hametin kooperasaun iha área desportu
DILI, 05 jullu 2022 (TATOLI)— Sekretáriu Estadu Juventude no Desportu (SEJD), Abrão Saldanha, tersa ne’e, hala’o enkontru ho Embaixadór Indonézia iha Timor-Leste, Okto Dorinus Manik, hodi kontinua hametin kooperasaun iha área desportu no renova nota entendimentu ne’ebé selebra ona iha 2016.
Objetivu hosi enkontru ne’e atu servisu hamutuk entre Indonézia ho Timor-Leste hodi dezenvolve área juventude ho desportu liuliu atu reativa fali akordu kona-ba define planu konkretu sira hodi implementa iha área desportu no juventude nian.
“Ita husu Indonézia nia ajuda hodi haree mós ba kestaun sira iha arte-marsiál nian. Ita ativa ona no ita hakarak atu enkuadra sira iha sistema desportu nian. Tanba Indonézia iha modalidade di’ak iha arte marsiál nian no agora daudaun sira mak lidera hela federasaun internasionál ba arte marsiál nian,” SEJD Abrão “Nokosiko” Saldanha, hateten ba Jornalista sira hafoin enkontru ho Embaixadór Indonézia ne’e.
Iha enkontru ne’e, SEJD Abrão dehan parte rua diskute mós kona-ba graduasaun PSHT nian ne’ebé sei realiza iha tinan ida ne’e. Nune’e husu parte Indonézia hodi lori ema sira ne’ebé atu fó graduasaun ba kandidatu foun sira tenke liuhosi dalan legál.
“Governu nia apoiu hodi buka dalan ajuda fasilita no komunika ho governu Indonézia lori konsellu graduasaun hodi mai fó graduasaun ba joven sira, preparasaun sira mak prepara governu disponibiliza fatin hamutuk ho autoridade seguransa no autoridade lokál sira hodi asegura atividade ne’e la’o ho pás no hakmatek iha ita nia rai,” nia dehan.
Iha fatin hanesan, Embaixadór Indonézia iha Timor -Leste, Okto Dorinus Manik, hateten Governu Indonézia hakarak hametin liután kooperasaun entre nasaun rua liuliu iha área desportu.
“Ami hare’e hamutuk saida mak ami bele apoiu ba hodi dezenvolve desportu. Tanba durante tinan rua liu ita paradu tanba situasauan pandemia globál,” nia afirma.
Nia hatutan, “Ami diskute mós kona-bá prosesu graduasaun ka pengesahan ba organizasaun Persaudaraan Setia Hati Terate (PSHT) nian atu bele realiza mós iha ne’e”.
Relasiona ho MoU no kooperasaun ne’e klaru katak liga ho área desportu hanesan realiza jogu iha fronteira no antes ne’e KBRI mós fó ona formasauan ba treinadór sira hosi SEJD.
“Ami mós haree hela poténsia ne’ebé Timor iha, hanesan futeból mós ema hahú sura ona iha Ázia liuliu U-19, Taekwondo no arte-marisál ne’ebé sei dezenvolve di’ak liután,” nia kompromete.
Notísia relevante: Agostu, PSHT halo graduasaun ba membru foun 9.000-resin
Jornalista: Hortencio Sanchez
Editór : Florencio Miranda Ximenes
