FILIPINA, 07 jullu 2022 (TATOLI)—ASEAN Football Federation (AFF) ka Federasaun Futeból ASEAN, tersa (05/07) ne’e, halo abertura ba kompetisaun Football Woman’s ne’ebé ho jogu abertura entre ekipa Timor-Leste kontra Myanmar ne’ebé hala’o iha Stadiun Binan, Laguna, Filipina.
Embaixadór Timor-Leste iha Filipina, Gaspar Piedade, hateten Timor-Leste nu’udar nasaun ida-ne’ebé jeografikamente iha rejiaun ASEAN tenbke partisipa eventu ida-ne’e ida-ne’e hanesan kontribuisaun ida.
“Timor-Leste nu’udar nasaun ida-ne’ebé jeografikamente iha mós Rejiaun ASEAN, maske ita seidauk sai membru ASEAN, ha’u haree katak partisipasaun ita-nian iha eventu desportivu ne’e, hanessan agora dadauk tuir kompetisaun rejionál AFF Women’s iha Filipina ne’e, hanesan kontribuisaun ida-ne’ebé di’ak,” Embaixadór Timor-Leste iha Filipina, Gaspar Piedade, hateten ba Agência Tatoli, bainhira asiste direta jogu entre ekipa Timor-Leste kontra Myanmar, iha stadiun Binan, Laguna, Filipina.
Iha jogu ne’e hetan entuziasmu makaas hosi jogadora sira hosi nasaun rua, hodi hatudu sira-nia kedah lori bola, kedok bola no pinta malu iha duut matak nia leten to’o xuta bola ba guarda rede tuir rítmu nu’udar jogadora feto.
Jogu abertura ne’e lidera hosi primeira arbitru no asistente arbitru na’in-rua ne’ebé lori jogu ne’e la’o ho di’ak. Jogu ne’e asiste direta hosi Embaixadór Timor-Leste iha Filipina, Gaspar Piedade, ho ninia espoza Maria da Conceição Correia de Lemos, adidu edukasaun iha Filipna no estudante timor-oan sira-ne’ebé eskola iha Filipina.
“Nu’udar timor-oan ha’u rasik ho diplomata sira, ami fó solidariedade hodi mai haree ita-nia ekipa jogadora feto sira joga. Purtantu, simplesmente fó apoiu morál no solidariedade hodi enkoraja sira liuhosi basa-liman, nune’e sira bele tuir kompetisaun ne’e ho di’ak to’o ramata,” diplomata ne’e hateten.
Durante jogu ne’e hala’o, ekipa TL no Myanmar, jogadora ida-idak hatudu sira-nia jeitu hanesan jogadora ne’ebé merese duni hodi reprezenta ida-idak ninia nasaun, tanba kompetisaun AFF women’s ne’e mós hanesan eventu importante ne’ebé nasaun ida-idak esforsu an luta “mate-moris” hodi defende ida-idak nia nasaun.
Maske ekipa Timor-Leste esforsu an atu bele hakat liu faze dahuluk ne’e maibé seidauk iha sorte atu bele manan ekipa Myanmar. Nune’e, to’o jogu ne’e ramata, ekipa Myanmar manan ekipa Timor-Leste ho skor 7-0.
Maske lakon maibé Jogadora Feto Timor-Leste ne’ebe mak liderada hosi Kapitaun Dolores V. D. S Costa (10) ne’e nafatin hatudu sira-nia kredebilidade jogu ne’ebé di’ak iha kampu laran to’o jogu ne’e ramata.
“Maske ita lakon maibé ita hatudu nafatin ita-nia amizade no dixiplina iha jogu ida-nia laran, tanba ita mai ne’e lori mós povu ho nasaun nia naran. Ida-ne’e mak ita tenke defende no hatudu. Lakon ka manan ne’e buat ida-ne’ebé normál. Importante hatudu ita nia dixiplina iha jogu laran, respeitu adversáriu sira no ba arbitrajen, nomós ba ema-ne’ebé asiste jogu ne’e, ne’e mak importante,” Ebaixadór ne’e apela.
Responsavél hosi Federasaun Futeból Timor-Leste (FFTL) ne’ebé akompaña delegasaun ne’e, Deliana Amaral da Costa, hateten maske ekipa Timor-Leste lakon maibe bele manan esperiénsia no jogadora sira iha mudansa makaas.
“Ha’u sente kontente tebes tanba bele partisipa jogu premeiru ne’e ho di’ak. Maske lakon maibé iha mudansa tebes ba alin jogadór Wommen’s Football Timor-Leste. Lakon la’ós signika atu para maibé lakon atu buka hadi’a di’ak liután iha futuru. Importante liu mak ami tenke prepara sira iha jogu sira-ne’ebé mak tuir mai, atu nune nafatin hatudu ba mundu no Timor-Leste rasik katak feto mór iha direitu hodi kompete iha área Futeból nian nomós fó motivasaun ba joven feto sira tuir mai iha futuru,” nia dehan.
Maske lakon maibé durante joga iha kampu laran, jogadora avansada Timor-Leste naran Vanesa F. P. Fernandes (7) ne’ebé mak sempre halo jogu moris durante minutu 90 nia laran, no sai hanesan women of the match ba jogu ne’e jogadora ho numeru farda “13” ho naran Nilda R. C. Ximenes.
Entretantu Adidu Edukasaun iha Filipina, Hitu Carvalho de Jesus, hateten nu’udar timoroan sente orgullu tanba iha jogu ebertura ida-ne’e hetan asiste direta hosi Embaixadór Timor-Leste iha Filipina ho nia espoza nomós hetan apoiu hosi másimu hosi studante timoroan ne’ebé oras ne’e daudaun hala’o sira-nia estudu iha Filipina.
“Biar lakon maibé nu’udar timoroan maluk mai fó apoiu no partisipa haree sira joga ne’e ne’e importante. Tanba ida-ne’e mós hanesan apoiu ida ba ita-nia jogadora sira. No, ho ita-nia prezensa bele hatudu ba nasaun seluk katak ita Timor-Leste nia oan iha duni unidade,” Hitu Carvalho de Jesus hateten.
Estudante timoroan ida-ne’ebé daudaun ne’e hala’o nua estudu iha Filipina, Najwo Amaral, sente haksolok haree jogadora Wommen’s Football Timor-Leste sira tuir kompetisaun rejionál AFF Women’s iha Filipina ne’e.
“Hanesan suporter Timor-Leste nian dehan lakon ka manan ita hatudu ona ita-nia jogu bonita. Ita sei iha nafatin esperansa ida katak jogu sei kontinua. Ohin ita lakon, aban ita bele manan,” Najwo Amarak dehan.
Hosi Programa AFF Women’s Football fo ninia signifikasaun ida ne’ebe mak boot tebes ba joven feto foinsa’e sira hodi hasae sira-nia talentu no mos bele hatudu lala’ok pratika jeneru iha sosiedade katak la’ós de’it mane sira mak bele joga futeból maibé mós bele tebe bola.
“Nu’udar estudante ami orgulhu ho Estadu Timor-Leste liu-liu ministériu relevante no nafatin apoiu ita-nia jogadora sira. Viva Timor-Leste. Forsa Ekipa Lafaek,” nia hateten.
Ekipa Wommen’s Football Timor-Leste Under-23 (U-23) ne’ebé lidera hosi treinadór hosi Korea ho naran Minyoung Lee ne’ebé tama iha Grupu B hamutuk ho nasaun Vietname, Myanmar, Cambodia no Laos ne’e, tuir planu, sei joga-hasoru fali ho Laos iha kinta (07/07) ohin no iha segunda (11/07) sei joga-hasoru Vietname.
Kompetisaun rejionál AFF Women’s iha Filipina ne’e nasaun 11 mak tuir hodi kompete mak nasaun Timor-Leste, Vietname, Myanmar, Laos, Cambodia, Thailandia, Filipina, Indonézia, Singapura, Austrália no Malázia.
Ekipa Wommen’s Football Timor-Leste Under-23 (U-23) ne’e tuir kompetisaun rejionál AFF Women’s iha Filipina ne’e mak; Gorette De F. de Deus Andrade da Costa, Madalena Lucia de Fatima Soares, Agostinha R. Nogueira, Martinha Doutel, Tasia Duarte Canizio, Brigida da Costa, Maria A. M. da Conceição, Natalia da Costa, Vanessa F.P. Fernandes, Godeliva F. M Martins, Milenia C. P Saldanha, Dolores V.D.S Costa, Elvira Ana da Silva, Nilda R. C dos Reis, Letizia da Cruz Elo Soares, Joana Barbosa Silveiro, Femania S. S. Babo, Julia Freitas Belo, Deonizia Natalina Barreto, Saturnina da Costa, Leticia J. de Jesus Oliveira do Rego, Natalia Menezes Lawa no Adelaide da Silva Carvalho.
Ekipa jogadora Timor-Leste hamutuk ho delegasaun daudaun ne’e hela iha Hotel Bellevue, Filinvest City, 5139 N Bridgeway, Alabang, Muntinlupa, 1781 Metro Manila, Filipina.
Kontribuidór : Heriberto Soares Pedro
Editór : Cancio Ximenes
