DILI, 08 jullu 2022 (TATOLI)—Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten Ministeriu Asuntu Kombatente Libertasaun Nasionál (MAKLN) ho Sekretáriu Estadu Kombatente Libertasaun Nasionál iha planu atu muda dedikasaun eskluzivu ho estudante involve iha funu.
“Entaun ho ida-ne’e mak ami tuur hamutuk ho MAKLN, Júlio da Costa “Meta Malik” ho Sekretáriu Estadu Kombatente Libertasaun Nasionál atu haree kona-ba dedikasaun eskluzivu ne’e, di’ak liu altera tiha inklui kona-ba estudante no funsionáriu sira,” nia dehan ba Agência TATOLI, iha nia knar fatin Comoro, Dili, kinta ne’e.
Tanba, nia dehan, bazea ba realidade ne’ebé mak iha katak funsionáriu no estudante maiória mak apoiu no partisipa makaas iha funu durante okupasaun Indonézia to’o tinan 24 nia laran maibé sira la hetan buat ida.
“Ida-ne’e lei la rekoñese, entaun ida-ne’e mak ita haree no tenke muda. Ezemplu, hanesan veteranu ida mate, bainira família ida mak mate hotu maibé ida de’it mak moris ne’e entaun nia simu de’it mak ema ida-nian. Entaun ho ida-ne’e presiza muda, nune’e kuandu família ida mak mate hotu entaun ita haruka de’it osan ba uma lisan hodi jere ba nia fúnebre. Lei hirak-ne’e mak ami aseita ona no ami entrega ona ba jurista MAKLN nian hodi prepara,” nia dehan.
Aleinde ne’e, nia dehan, lei la permite atu menoridade sira-ne’ebé mak iha tempu rezisténsia labarik sira mós luta ba ukun rasik an liuhosi envolve-an iha fernte klandestina no balun kaer kilat funu hasoru inimigu sira, no iha biban ukun rasik an ne’e sira sei lahetan buat ida.
“Ita ko’alia kona-ba labarik iha ai-laran ka destera ba Ataúro ne’e, lei la ko’alia ida-ne’e maibé lei ko’alia kona-ba autór ba funu. Maibé ida-ne’e ita sei haree no muda para labarik sira-ne’e mós hetan direitu,” Riak Leman hateten.
“Ami mak halo lei, maibé la’ós Riak Leman mak doutor ba lei ne’e, tanba iha altura ne’ebá deputadu iha Parlamentu Nasionál ne’e, opozisaun ne’e uitoan nune’e labele halo buatida. Tanba ne’e, ita labele fó sala ba malu no la’ós tempu para atu fó sala malu maibé buka dalan para oinsá altera lei, nune’e fó benefísiu mós ba veteranu ne’ebé ho idade kiik iha momentu ne’ebá,” nia dehan.
Tuir nia, hanesan kosikuénsia funu ne’ebé labarik barak mak destera ba Ataúro ne’e, sira halo vida foun, sira soe sasán iha rai-boot no sei la lori buat ida no sira iha Ataúro ne’e halo moris foun fali.
“Ida-ne’e ita konta, maibé iha lamentasaun barak. Barak ida nune’e, entaun ita hotu ba kadeia no destera hotu ba Ataúro, sé mak halo funu hodi bele ukun an,” nia hateten.
Jornalista : Osória Marques
Editór : Cancio Ximenes
