Governu husu komunidade keixa funsionáriu saláriu $500 simu Cesta Bázika
BOBONARO, 08 jullu 2022 (TATOLI) – Ministru Koordenadór ba Asuntu Ekonómiku (MAKE), Joaquim Amaral, husu ba komunidade sira atu hato’o keixa bainhira identifika funsionáriu estadu nian ne’ebé manán saláriu $500 simu ai-han Cesta Bázika faze daruak nian.
Nia informa asuntu ne’e bainhira halo lansamentu distribuisaun programa Cesta Bázika faze daruak iha suku Ritabou, postu administrativu Maliana, munisípiu Bobonaro, sesta ne’e.
Notísia relevante:MKAE husu distributór Cesta Bázika kumpre utiliza produtu lokál 75%
“Ita-boot sira haree, karik iha família ka ema balu ke manán saláriu $500 fulan ida, nia mai simu, ha’u husu ita-boot sira tenke aprezenta keisa, atu nune’e bele esklui tiha, sira-nia família bele simu, maibé sira-ne’ebé hetan osan liu dolar $500 labele,” Governante ne’e apela.
Nia dehan, daudaun ne’e prosesu distribuisaun la hanesan ho tinan kotuk tanba envolve ona Komisaun Antí Korrupasaun (CAC, sigla portugés), Provedoria Direitu Humanu no Justisa (PDHJ).
Nune’e mós produtu Cesta Bázika ne’e hetan verifikasaun hosi Autoridade Inspesaun no Fiskalizasaun Atividade Ekonómiku, Sanitária no Alimentár, Institutu Públiku (AIFAESA,I.P).
Enkuantu benefisiáriu Cesta Bázika faze daruak iha territóriu nasionál hamutuk millaun 1,4 ho totál orsamentu millaun $80.
Nia husu funsionáriu ne’ebé simu saláriu liu $500 atu onesta nune’e voluntariamente deklara atu labele simu.
Ministru Joaquim hateten, governu ne’e mós dezeña ona programa foun ida ba tinan 2023 ho naran ‘Cadeia de Valores’ ka atu dezenvolve no promove agrikultór sira-nia produtu lokál ba merkadu nasionál no munisipál nune’e labele dependénsia liu ba produtu importasaun.
Notísia relevante: Abitante Ritabou kestiona kampañia kahur produtu ‘fuhuk’ iha Cesta Bázika
Jornalista : Sérgio da Cruz
Editór : Evaristo Soares Martins
