iklan

DILI

Konsellu veteranu Manatuto husu Governu integra veteranu 2000-resin iha vida ekonómika

Konsellu veteranu Manatuto husu Governu integra veteranu 2000-resin iha vida ekonómika

Veteranu sira partisipa serimónia seimónia loron refleksaun ba saudozu David Alex Daitula nia loron mate. Iha Woratiti, Suku Caibada, Postu Baucau Villa Munisípiu Baucau, sabadu (27/11). Imajen Tatoli/Francisco Sony

DILI, 15 jullu 2022 (TATOLI)—Prezidente Konsellu Veteranu Munisípiu Manatuto, Boaventura Soares ‘Tocha’, husu Governu tenke konsidera hodi integra veteranu grau 0-3 no 4-7 iha munisípiu Manatuto hamutuk 2000-resin ne’e iha vida ekonómika.

“Ita presiza Governu nia konsiderasaun hodi apoiu ba veteranu ne’ebé la hetan pensaun fulan-fulan nian. Ha’u dehan hanesan tanba durante ne’e Governu seidauk integra veteranu iha vida ekonómika,” nia dehan Agência TATOLI, liuhosi telefone, sesta.

Veteranu barak liu-liu sira-ne’ebé mak simu osan naton maibé veteranu grau 0-3 no 0-7 ne’ebé lahetan pensaun ne’e, Governu foin hahú inisia no planu atu apoiu osan ba grupu veteranu hirak ne’e atu halo negósiu ka haki’ak animál.

“Ho programa no planu ida-ne’e ami entrega ona proposta ba Governu maibé seidauk simu rezultadu no bainhira mak asina akordu hodi simu osan no implementa, maibé ami hein de’it,” nia dehan.

Ho prosesu ne’ebé naruk no kleur, mak atu di’akliu programa Governu nian ne’e kanaliza direta ba iha Konsellu Veteranu Munisipál sira hodi halo jestaun rasik.

“Ha’u rekomenda ba Governu katak karik iha osan duni, nusa la kanaliza mai direta iha Konsellu Veteranu Munisipál depois mak Konsellu Nasionál mai monitoriza ka superviziona atividade ne’ebé grupu benefisiáriu hala’o iha baze,” Tocha rekomenda.

Tanba ne’e, Prezidente Konsellu Veteranu Manatuto ne’e husu atu iha programa ruma liga ho veteranu, di’akliu ba direta depois mak Konsellu Nasionál kompleta ho matadalan no kritériu atu nune’e munisípiu bele jere mesak.

Hafoin ne’e, nia dehan, Konsellu Veteranu Nasionál bele kontrola katak iha responsabilidade duni ka lae no bainhira rezultadu sai mak laiha benefísiu ka la fó vantajen ba benefisiáriu mak Nasionál bele foti desizaun.

Osan ne’ebé aloka ba grupu benefisiáriu Manatuto hamutuk rihun $3,8 hodi finansia ba grupu veteranu sira hakiak animál inklui aloka balun ba estudante hodi fasilita estudante finaliza sira.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!