Abríl-jullu: AMD rekolla taxa estasionamentu $8,271.85
DILI, 21 jullu 2022 (TATOLI)—Adjuntu Prezidente Autoridade Munisípiu Dili, António Moniz Clau, informa hahú iha fulan abril to’o jullu tinan ne’e, Autoridade Munisípiu Dili (AMD) rekolla taxa estasionamentu hamutuk $8,271.85.
Notísia Relevante: Janeiru-marsu: AMD rekolla taxa estasionamentu $7,488.80
“Taxa estasionamentu ne’ebé ita-nia pesoál estasionamentu sira kobra durante fulan abril to’o iha jullu hamutuk $8,271.85, maibé ida-ne’e la tama fulan-juñu tanba fulan juñu ita laiha atividade,” Antóniu Moniz Clau hateten ba Agênsia Tatoli iha nia knar fatin, Díli, kinta ne’e.
Hosi orsamentu estasionamentu $8,271.85 ne’e, iha fulan-abríl halibur $4,930.30, maiu $1,611.10, juñu laiha no jullu hahú hosi 01 (sesta/07) to’o kinta (21/07) ne’e hamutuk $17,30,45.
Maske nune’e, nia informa, iha fulan juñu ne’e taxa estasionamentu laiha tanba iha fallansu prodús billete estasionamentu. Maibé AMD halo pedidu ba Ministériu Finansas iha fallansu tékniku uitoan iha ne’ebá, no iha jullu ne’e mak foin hetan fali billete ne’e hodi hala’o servisu.
Hosi atividade rekolla taxa estasionamentu ne’e, AMD rekolla iha área jardin 05 maiu, terminál Taibesi, colmera no estrada audian.
Difikuldade ne’ebé pesoál sira kobre taxa estasionamentu sira iha terrenu mak preokupa uitoan ba sira-nia nesesidade hanesan susar asesu ba toilet, maibé AMD tenta koordena ho fatin estasionamentu sira, hodi orienta Diretór Estasionamentu, Diretór Jestaun no Merkadu mak tutela ba asuntu ne’e halo hela koordenasaun ho uma sira ne’ebé ita-nia pesoál sira halo servisu ba, atu fasilita pesoál sira iha terenu.
Jornalista : Nelia Fernandes
Editór : Cancio Ximenes
