BAUCAU, EKONOMIA, HEADLINE, MUNISÍPIU

Infraestrutura importante hasa’e produsaun agrikultura

Infraestrutura importante hasa’e produsaun agrikultura

Sekretáriu Munisípiu Baucau, Simão dos Santos Marques Pinheiro. Imajen Tatoli/Natalino Belo.

BAUCAU, 21 jullu 2022 (TATOLI) – Autoridade Administrasaun Munisipál Baucau konsidera infraestrutura hanesan kanál irrigasaun importante hodi hasa’e produsaun agrikultura.

Sekretáriu Autoridade Munisipu Baucau, Simão dos Santo Marques Pinheiro, hateten fatór seluk ne’ebé presiza reforsa mak rekursu umanu no finanseira ne’ebé sai fatór determinante ba agrikultór atu hasa’e produsaun.

“Ita tenke reforsa tán iha parte balun atu produsaun aumenta barak tán, presiza reforsa tán rekursu umanu, infraestrutura atu hasa’e produsaun agríkola, presiza hadi’a irrigasaun ne’ebé sei kompeténsia hosi nasionál,” Sekretáriu Autoridade Munisipu Baucau hateten iha Vila Antiga, kinta ne’e.

Fatór rekursu umanu determinante ba produsaun, nune’e presiza iha kapasitasaun hanesan fó koñesementu ba agrikutór sira atu prepara-aan, transforma hosi tradisionál ba moderna tuir dezenvolvimentu teknolojia.

Simão esplika, autoridade munisipál serbisu bazea ba kompeténsia ne’ebé atribui hosi dekretu-lei númeru 3/2016 nune’e kompeténsia ne’ebé atribui ba autoridade limitadu ne’ebé difikulta atu halo intervensaun hanesan hadi’a kanál irrigasaun.

“Fatór hirak-ne’e bainhira kompleta ona, nu’udar autoridade Baucau garante produsaun agrikultura bele aumenta,” Simão Pinheiro akresenta.

Servisu Munisipál Agrikultura no Peska Baucau nu’udar tékniku agrikultura hala’o knaar bazea ba kompeténsia ne’ebé atribui hosi autoridade munisipál liuhosi diploma konjunta númeru 48 Ministériu Administrasaun Estatal (MAE) no Ministériu Agrikultura no Peska (MAP) bazea ba dekretu-lei númeru 3/2016.

Entretantu, kanál irrigasaun sira hanesan Luge iha suku Soba, postu Laga, suku Badumori, Fatulia, postu Venilale, Larisula, postu Baguia no Bluto,  postu Vemase ne’ebé dadaun ne’e presiza halo reabilitasaun.

Nune’e mós semí-permanente sira hanesan iha suku Ossouala, postu Venilale, Baucau vila hanesan suku Samalari, Seiçal, Gariuai, Buruma no Uailili no postu Laga iha suku Samalari, Soba.

Agrikultór iha Baucau maioria prodús ai-haan hanesan foos, batar, fore-rai, liis no tomate ne’ebé tuir dadus, utiliza tótal rai ba atividade natar hamutuk ektare rihun 14 no to’os hamutuk ektare rihun 16.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!