DILI, 02 agostu 2022 (TATOLI)—União Nasional dos Escuteiros de Timor-Leste (UNE-TL) ho ninia estrutura nasionál sei hala’o enkontru ho Arsebispu Arkidioseze Metropolitana Dili, Kardeál Don Virgílio do Carmo da Silva, SDB, hodi relata kona-ba atividade eskutériu nian liu-liu servisu sosiál, apoiu umanitária no servisu dame sira-ne’ebé grupu eskutériu sira iha UNE-TL hala’o daudaun iha rai-laran.
“Enkontru ne’e ko’alia kona-ba atividade eskutériu iha Timor-Leste no servisu social no apoiu umanitáriu sira-ne’ebé membru UNE-TL hala’o durante ne’e,” Prezidente UNE-TL, Idelta Rodrigues, hateten liuhosi komunikadu imprensa ne’ebé Agência Tatoli asesu, tersa ne’e.
Enkontru ne’e hanesan ba dahuluk UNE-TL hasoru ho kardeál foun Timor-Leste hafoin hetan nomeasaun hosi Amo Papa Francisco iha fulan-maiu liubá, tanba ne’e UNE-TL hato’o votu parabéns dahuluk ba Arsebispu Don Virgílio do Carmo da Silva.
Asuntu importante seluk mak follow-up sorumutu entre Kapelaun Eskutéiru Mundiál (WOSM) ho Amu Bispu Dioseze Dili no Baucau, iha momentu Padre Kapelaun Eskutéiru Mundiál nia vizita mai Timor-Leste, iha juñu 2016, oinsá UNE-TL bela sai membru ba ICCS (International Catholic Conference of Scouting) no mos Nomeisaun Kapelaun ba UNE-TL.
Iha semana ida-ne’e, estrutura nasionál UNE-TL sei hala’o enkontru ho Vise Primeiru-Ministru no Ministra Sosiál Solidaridade no Inkluzaun (MSSI), Armanda Berta, no mós sei hato’o apresiasaun ba kooperasaun ne’ebé durate ne’e estabelese tiha ona ho Sekretariadu Estadu Juventude no Desportu (SEJD).
Enkontru ne’e mós UNE-TL sei relata servisu no atividadede UNE-TL ninia iha rai-laran no mós rai-liur, progresu no dezafiu ba Vise PM ne’ebé mós kaer asuntu edukasaun, sosiál, saúde no foinsa’e.
Aleinde ne’e sei ko’alia mós kona-ba kooperasaun UNE-TL ho Ministériu Edukasaun atu tau atividade Eskutizmu hanesan atividade extra-kurikuler ka non-formál ba eskola hotu-hotu iha territóriu Nasionál.
Asuntu importante balun mak sei sai iha ajenda diskusaun mós kona ba planu Jambore Nasionál 2022 no partisipasaun UNE-TL nian atu haruka delegesaun ba Jambore Mundiál ba dala-25 iha Korea do Súl iha Agostu 2023.
Jornalista : Osória Marques
Editór : Cancio Ximenes
