HEADLINE, SAÚDE

PM Taur husu inan sira obrigatóriu fó susu-been eskluzivu ba bebé

PM Taur husu inan sira obrigatóriu fó susu-been eskluzivu ba bebé

Primeiru-Ministru, Taur Matan Ruak, halo vizita ba inan sira fó susu-been ba oan iha HNGV, Bidau, sesta (05/08). Imajen Tatoli/Francisco Sony

DILI, 05 agostu 2022 (TATOLI)–Primeiru-Ministru (PM), Taur Matan Ruak, husu inan sira obrgatóriamente fó susu-been eskluzivu ba bebé hahú moris.

“Ha’u husu inan sira tau-matan ba oan sira hodi fó susu-been obrigatóriu durante fulan-neen to’o tinan rua, tanba bainhira ita ajuda ita-nia oan sira-nia saúde, maka ita ajuda ona ita-nia nasaun tanba ita trata hela futuru Primeiru-Ministru, Prezidente Repúblika, Ministru Saúde, Diretór no Jenerál ida,” PM Taur hateten bainhira partisipa iha lansamentu Laboratóriu Nasionál Referénsia Tuberkuluze, iha HNGV, Bidau, sesta ne’e.

Notísia relevante: Governu kompromete mellora kondisaun ospitál

Xefe Governu hato’o lia hirak ne’e relasiona ho komemorasaun semana mundial fó susu-been inan iha agostu 2022.

“Labarik sira mak aban bainrua lidera ita-nia nasaun, tanba ne’e tenki kuidadu kedas sira hosi kiik, liuhosi aktu sira ne’e. Bainhira la kuidadu kedas hosi kiik, ita-nia esforsu agora ne’e laiha sentidu, tanba loron aban ita entrega ba sé, tanba loron aban ba oin ne’e sira-nia, entaun tenke tau-matan ba sira. Ne’e hanesan ita kuda sabraka karik tenki tau adubu di’ak, rega didi’ak atu boot mai fó fuan mós boot no di’ak, entaun ita tau-matan ba ita-nia oan sira ne’e mós hanesan ne’e,” nia akresenta.

Iha sorin seluk, Organizasaun Mundiál Saúde (OMS) apela ona atu kontinua fó susu-been inan eskluzivu durante fulan-neen nia laran no akompaña ho ai-han komplementár to’o tinan rua ka liu, hanesan fornese inísiu di’ak ba bebé no labarik sira ba moris diak.

Susu-been inan sei kontinua fornese nesesidade nutrisionál no enerjia ne’ebé labarik sira presiza durante fulan-neen tuir mai. Tanba ne’e inisiasaun sedu fó susu-been inan, durante oras ida nia laran hafoin bebé moris, bele proteje bebé foin-moris sira hosi infeksaun no moras króniku, inklui hamenus mortalidade ba bebé foin moris.

Aleinde ne’e, fó susu-been eskluzivu inan bele aumenta relasaun emosionál inan ho oan no fó impaktu pozitivu.

Iha rejiaun sudeste aziátiku, taxa ba inisiasaun sedu vária a’as liu maka 89% no kiik liu maka 42%, tanba ne’e OMS kontinua apoia nasaun iha rejiaun sira hodi fortalese kapasidade proteje, promove no apoia fó susu-been inan, ne’ebé aliña ho prioridade hodi atinje kobertura saúde universál, prevensaun no kontrola moras la hada’et, no aselera redusaun mortalidade inan, bebé foin moris no mortalidade iha labarik.

Iha tinan 2018, aprosimademente 54% hosi bebé iha rejiaun maka eskluzivamente simu de’it susu-been inan to’o fulan-neen, kompara ho dadus hosi tinan 2015 ho 47% no a’as liu alvu globál, ne’ebé asegura katak iha tinan 2025 labarik ne’ebé simu susu-been inan eskluzivu tenke atinje 50% durante fulan-neen nia laran.

Infelizmente, iha rejiaun ida-ne’e, ba tinan 2016 to’o 2017, bebé moris iha fasilidade ospitál ne’ebé implementa ospitál amigável hadomi kosok oan, OMS no UNICEF nian iha de’it 5%, ne’ebé fasilidade ne’e ho objetivu hodi institusionaliza fó susu-been inan iha sistema kuidadu saúde, ne’ebé foka ba implementasaun pasu 10 fó susu-been inan ho susesu no promove kontaktu kulit ho kulit, Kangaroo Mother Care, no laiha separasaun inan ho bebé, nu’udar asaun hotu ne’ebé sei hamenus morbidade bebé foin moris no hasa’e sobrevivénsia.

OMS identifka ona maneira balun ba nasaun sira iha rejiaun hodi aselera progresu atu proteje, promove no suporta fó susu-been inan no la husik feto ida, labarik no bebé foin moris iha kotuk.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!