Belun-UNFP lansa mensajen video violénsia kontra feto no labarik feto
DILI, 08 agostu 2022 (TATOLI)–Organizasaun Naun Govermentál Belun ho Fundu Nasaun Unida ba Populasaun (UNFPA, sigla inglês) liuhosi programa spotlight lansa mensajen ida kona-ba violénsia kontra feto no labarik feto.
“Mensajen ne’e atu konsesializa ita-nia populasaun no video ne’e ho nia durasaun minute 20,” Diretór Executivo Belun, Luís Ximenes, hateten ba jornalista sira, iha Fatuhada, Dili.
Video ne’e aprezenta ba parseiru no Governu no mós bele disponibiliza iha pájina Facebook ne’ebé mak asesu.
Nia dehan organizasaun ne’e aprezenta video ba populasaun atu fó koñesimentu kona-ba aktu violénsia kontra feto no labarik feto.
Diretór ne’e relata katak video ne’ebé mak aprezenta ne’e ho forma komunikasaun entre ema adultu no labarik hodi prevene violénsia kona-ba igualdade bazea ba jéneru.
Koordenadora ba Programa Violénsia Bazeia ba Jéneru iha UNFP iha Timor-Leste, Mihye Shin, relata servisu ajénsia iha koopersaun ho Belun para iha konsesializa ba populasaun sira kona-ba violénsia refere nune’e elimina asuntu ne’e.
Violénsia kontra feto no labarik feto bele hamenus, entaun presiza apoiu hosi Planu Asaun Nasionál (PAN) kona-ba desigualdade.
“UNFP servisu hamutuk ho Governu no sosiedade sívil atu elimina iha prátika violénsia,” nia dehan.
Tuir peskiza ne’ebé mak Belun halo iha tinan 2021, feto no labarik feto hamutuk 1,260 ne’ebé mak infrenta violénsia fíziku, seksuál no emosionál iha Munisípiu Bobonaro, Ermera no Viqueque.
Jornalista : Osória Marques
Editór : Cancio Ximenes
