DILI, 08 agostu 2022 (TATOLI)—Kordenadora Jerál Tasa Kompetisaun Avó Nana 2022, Glenda Carvalho, hateten Asosiasaun Turizmu Relijioza Timor-Leste (ATR-TL) hakarak promove fraternidade umana ba foinsa’e sira-nian iha Timor-Leste liuhosi kompetisaun múzika ho tema “Konsolidasaun Fraternidade Umana”.
Notísia Relevante: PN aprova rezolusaun adota deklarasaun Pás Mundiál ho unanimidade
“ART-TL mós hakarak promove talentu foinsa’e sira-nian depois hosi atividade ne’e mós ita hakarak hametin unidade, fraternidade umana, no iha diversidade kultura nian. Tanba atu hametin diversidade ne’e maihosi relijiaun ne’ebé la hanesan, rasa, kór, kultura ne’ebé la hanesan, entaun ho fraternidade mak ita sai ida de’it,” Glenda Carvalho hateten ba jornalista sira hafoin partisipa abertura pra audisaun grupu korál, Taxa Xanana 2022, iha Salaun Multifunsaun Igreja Hosana, Bebora, Dili, segunda ne’e.
Objetivu realiza atividade ne’e mak atu selebra no fó apresiasaun ba Maun Kay Rala Xanana Gusmão ne’ebé mak halo tinan 76 iha tinan ida-ne’e.
Nune’e, loron ohin halo abertura ho atividade modalidade nian no aban kona-ba korál nian, kompetisaun konkursu múzika ho modalidade rua (2), vokál grupu ne’ebé hetan apoiu hosi Avó Nana.
Totál grupu ne’ebé partisipa iha kompetisaun grupu korál no kompetisaun konkursu múzika ne’e ne’e hamutuk gurpu 24 ho kategória vokál grupu lima no grupu korál (koru) 19 ho ema hamutuk 767.
Prezidente Asosiasaun Turizmu Relijioza Timor-Leste (ATR-TL), Pe. Angelo Salsinha, dehan mundu ne’e nakonu ho buat barak, iha ema, natureza, kultura no relijiaun hotu-hotu mesak di’ak nune’e presiza ema hotu ne’ebé konsolida hodi halo buat sira ho hamutuk ne’e mak ohin loron defísil.
Tanba, fraternidade mak presiza ema ne’ebé anima, ida-ne’ebé tau hamutuk apresia beleza hirak ne’e, hamutuk ba mundu nia furak no umanidade nia di’ak hodi halo planeta ida-ne’e furak no ksolok.
Tuir nia, atu bele la’o tuir Maromak nia vontade tinan naruk nian mak ema hotu bele moris di’ak, tanba ne’e mak konfiansa tomak hosi ekipa Avó Nana nian selebra tinan 76 hodi fiar ba ART-TL hodi realiza atividade ne’e.
“Ho ekipa Avó Nana nian ami hosi ART-TL prontu halo festival Internasionál interelijiozu. Ita hahú ho avó Nana nia apoiu ne’e ami mehi ona 12 outubru. loron amu papa João Paulo II vizita Timor-Leste, sadik Timoroan iha nakukun no triste nia-laran, no dehan ba timorooan ‘Imi mak sai Naroman no Masin mundu nian’, sé mak bele sai sé la’ós mak imi ida-idak,” Prezidente ART-TL hateten.
Situasaun ida-ne’e mak fanu nafatin ho sentidu ida hosi apoiu ne’e, mak hakarak lori duni atu koko masin no naroman mak oinsá iha Timor-Leste. Entaun ART-TL iha kompromisu bazea ba dezenvolvimentu maibé tenke fuan ida de’it tanba mundu ohin loron ne’e problema fuan, entaun kuandu fuan sai ida mak hadomi umanidade no hadomi mundu.
Líder istóriku, Kay Rala Xanana Gusmão, agradese tanba Timor seidauk akontese problema kona-ba relijiaun nian.
“Ha’u husu mak mantein nafatin fraternidade umana entre relijioza, ita la haree ó katolika, protestante, Hindu, Musulmanu, ita mesak Timoroan. Ha’u fiar, ho ida-idak nia fiar ita respeita malu tanba ita respeita malu mak hamutuk hametin unidade no unidade liuhosi amizade, no hanoin de’it mak interrese rai no povu ida-ne’e nian,” Kay Rala Gusmão Gusmão hateten.
Notísia Relevante: Ramos Horta-PPN ko’alia TL atu adota deklarasaun Pás Mundiál
Jornalista : Osória Marques
Editór : Cancio Ximenes
