SEFOPE apoiu rihun $49 ba STVJ Bairru Pite hodi konstrui uma ospitalidade

DILI, 09 agostu 2022 (TATOLI)–Sekretáriu Estadu Formasaun Profesionál no Empregu (SEFOPE), Alarico do Rosário, hateten, SEFOPE apoiu orsamentu ba Sentru Treinamentu Voksionál Juventude (STVJ) iha Bairru Pite hodi konstrui uma ospitalidade.
“Ami laiha osan ne’ebé mak boot maibé tuir forsa no kbiit ne’ebé ami iha mak iha rihun $49. Nune’e, Diretór STVJ atu labele haree osan nia montante maibé ami hakarak ne’e ita-boot sira mai ita servisu hamutuk no koopera malu atu iha uitoan ka barak kontribui hodi hasa’e ita-nia joven sira-nia kapasidade hodi bele kompete iha merkadória,” SEFOPE hateten nia diskursu ba Agência Tatoli, bainhira partisipa lansamentu primeira pedra konstrusaun Housekeeping ba formasaun profisionál área ospitalidade iha STVJ Bairru Pite, Dili, tersa ne’e.
Importante mak hotu-hotu servisu hamutuk hodi trata no kapasita no mós hasa’e kuiñesimentu joven sira-nian iha área ospitalidade no restorante nian iha STVJ ne’e.
“Nune’e futuru bele prenxe merkadu rai-li’ur no merkadu rai-laran maibé presiza joven ne’ebé mak iha esperiénsia no iha abilidade mak bele kompete merkadoria,” nia dehan.
Entretantu Diretór STVJ Bairru Pite, Adão Ornai, hateten konstrusaun ne’e sei konstrui aban no hetan suporta hosi parseiru AUSAID no apoiu mós hosi INDIMU.
“Aban ita hahú halo konstrusaun ba ospitalidade nian ho nia kuartu neen (6) inklui ho laundry. Kuartu neen fahe oin tolu, ida mak kuartu single room, twin no deluxe. Tanba ami hakarak buat saida mak tau iha otél ne’e tenke kompletu nune’e labarik sira la’o tuir hanesan sira-nia esperiénsia ne’ebé sira aprende ona iha STVJ,” nia dehan.
Nia dehan, konstrusaun ne’e nia durasaun fulan haat (4) hahú aban fulan ne’e.
Daudaun ne’e, nia dehan, formandu ba formasaun ospitaliadade hamutuk 25 mak sei kontinua hela tuir formasaun iha STVJ.
Jornalista : Osória Marques
Editrór : Cancio Ximenes

