DILI, SEGURANSA

PM Taur deside kansela rekruta membru PNTL foun

PM Taur deside kansela rekruta membru PNTL foun

Membru PNTL halo parada iha ámbitu serimónia komemoraun loron Restaurasaun Independénsia Timor-Leste ba da-XX, iha Palásiu Prezidensiál, Bairro Pité, sesta (20/05). Imajen Tatoli/Francisco Sony

DILI, 11 agostu 2022 (TATOLI)—Primeiru Ministru (PM), no Ministru Interiór (MI), Taur Matan Ruak, deside kansela rekrutamentu ba membru foun Polísia Nasionál Timor-Leste (PNTL) foun.

Notisia Relevante: 2023, Governu planu halo rekrutamentu ba membru PNTL na’in-720 

“Ha’u kansela tanba dezenvolvimentu instituisaun hotu-hotu inklui PNTL tenke tau matan mós ba ita-nia ekonomia. Se hahán uitoan ita hatama ema barak ne’e kualidade laiha no hahán la to’o ita problema,” PM Taur hateten ba jornalista sira hafoin ramata enkontru semenál ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, kinta ne’e.

Tanba, Xefe Governu ne’e dehan, haree ba númeru efetivu PNTL agora boot, nune’e bainhira rekruta tan sei aumenta despeza no orsamentu mós sei boot liután.

“Ita-boot sira (jornalista) haree, kuandu ha’u jenerál ha’u-nia planu mak ida ne’e, F-FDTL só iha tinan 20 liu mak nia atinje 3000. Tinan 20 liu, dezde 2001 to’o 2020 ne’e, sira foin 2600 no PNTL sa’e tiha ba 4000, depois hakarak aumenta osan, entaun sira ki’ak sira iha foho ne’e, ita halo nusa,” nia hateten.

Nune’e, nia deside laiha rekrumentu no rekrumentu hanesan PNTL no F-FDTL atu aumenta tenke haree ba ameasa no risku ne’e, labele hatama ema depois ba han de’it no tuur de’it iha kazerna depois ezije saláriu.

“Hanoin ida-ne’e labele maibé tenke servisu. Entaun, ha’u dehan ba sira enkuantu ha’u mak Ministru Interiór no agora Primeiru Ministru, primeiru, PNTL ninia rekrutamentu laiha,” nia hateten.

Segundu, nu’udar PM no mós hanesan Ministru Innteriór ninia prioridade mak ema-ne’ebé tinan 60 tenke reforma, entaun tenke altera lei hodi sira idade reforma deskansa ona, nune’e joven sira sa’e fali.

Notísia Relevante: Governu aprova dekretu-lei rua hosi MI

“Se lae katuas hotu, ita la’o labele hotu ona, hanoin la la’o ona ita problema boot iha ita-nian no joven sira fatin laiha ne’e,” nia dehan.

Entertantu, antes ne’e, Vise Ministru Interiór (MI), António Armindo, hateten Governu liu-hosi Ministériu Interiór (MI) iha planu halo rekrutamentu ba ajente PNTL foun hamutuk 720 iha tinan 2023.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!