DILI, 10 agostu 2022 (TATOLI)-–Governu liuhosi reuniaun Konsellu Ministru (KM), kuarta ne’e, aprova ona projetu dekretu-lei rua, ne’ebé aprezenta hosi Primeiru-Ministru no Ministru Interiór, Taur Matan Ruak, no hosi Vise-Ministru Interiór, António Armindo, kona-ba estatutu profisionál ba pesoál ho funsaun polisiál sira hanesan Polísia Nasionál Timor-Leste (PNTL).
“Diploma ne’e ho objetivu atu fó ba PNTL estatutu profisionál ba pesoál rasik, ho perspetiva atu hasa’e kondisaun serbisu ba pesoál, haree ba parte seluk,inklui hasa’e kuadru motivasionál no autoestima PNTL,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.
Notísia relevante: PNTL presiza esforsu kombate krime tráfiku umanu iha Timor-Leste
Aleinde ne’e, estatutu ne’e hodi reforsa ninia kapasidade hasoru responsabilidade ne’ebé aumenta ba beibeik, ezijénsia no nesesidade efikásia atu fó servisu públiku ba seguransa , liga ba nível nesesidade sosiedade timor-oan, ne’ebé sai informada, komplexa, ezijente liután, no iha sorin seluk hodi adapta ba realidade sosiál foun no ba dezafiu país ne’e no mundu atuál.
Dekretu-lei daruak ne’e ho objetivu atu halo alterasaun ba rejime remuneratóriu PNTL nian.
“Hakarak ho alterasaun ida-ne’e kumpre ho saida ne’ebé hakerek iha númeru 2 hosi artigu da-24 dekretu-lei númeru 2/2022, loron 12 janeiru, ne’ebé aprova ona hosi rejime remuneratóriu PNTL, ne’ebé Estadu kompromete ona atu fó iha tinan 2023, iha aumentu 15% ba remunerasaun baze membru PNTL,” nia akresenta.
Nune’e mós, ba remunerasaun baze ne’ebé prevee ona halo atualizasaun ba diploma, haree ba alterasaun orgánika PNTL ne’ebé foin aprova no haree mós ba nesesidade atu halo redasaun ida ne’ebé ho objetivu liután hodi fasilita interpretasaun ba artigu balun ne’ebé inklui iha versaun diploma ne’ebé vigora hela.
Jornalista : Antónia Gusmão
Editora : Julia Chatarina
