DILI, 11 agostu 2022 (TATOLI)—Ativista no Treinadora ONG Belun, Maria Fátima Sara, hateten Programa Dezenvolvimentu Nasaun Unidu (PDNU) ho Organizasaun Naun Govermentál (ONG) Belun, hala’o formasaun eleisaun inkluzivu ba eleitór foun liu-liu foinsa’e, Ema ho Defisiénsia (EhD) no LGTBI (Lesbian, Gay, Bisexual, Transjender no Inter-Seksu) iha Timor-Leste.
Formasaun ne’e halo kooperasaun ho autoridade lokál, organizasaun sosiedade sivil no akadémiku sira.
“Susesu hala’o formasaun eleisaun inkluzivu ne’e hodi atinje partisipasaun juventude na’in-257 kompostu hosi feto 145 no mane 112 no mós Ema ho Defisiénsia hamutuk 10 no LGBTI 14,” Maria Sara hateten liuhosi nota komunikadu ne’ebé Agência TATOLI asesu.
Tanba, tuir nia, foinsa’e sira nu’udar atór xave sira atu estabelese dame iha Timor-Leste, espesialmente liuhusi prosesu eleisaun ne’ebé ema hotu tenke hola parte ba demokrásia, hodi foti inisiativa ida atu apoia nasaun ne’e no estabelese futuru ne’ebé di’akliu.
Formasaun eleisaun inkluzivu ba eleitór foun sira hahú ona iha fulan-abril to’o juñu 2022, iha Munisípiu Ainaro, Bobonaro, Baucau, Covalima, Ermera, Lautém, Manufahi, Viqueque no RAEOA, hodi prepara ba eleisaun parlamentár, eleisaun munisipál no suku iha 2023.
Atividade ne’e ninia audiénsia ba foinsa’e sira espesialmente ba foinsa’e votante foun sira ho objetivu atu hakle’an liután sira-nia kompreensaun kona-ba importánsia atu enkoraja ema-ne’ebé la reprezenta iha eleisaun hanesan feto, ema ho defisiénsia no LGBTI atu vota hodi asegura katak “laiha ema ida hela iha kotuk”.
Formasaun ne’e hetan apoiu finanseiru hosi Governu Japaun, projetu UNDP CORE-TL haka’as an atu asegura eleisaun informadu, seguru no inkluzivu.
Jornalista : Osória Marques
Editór : Cancio Ximenes
