DILI, 12 agostu 2022 (TATOLI)—Organizasaun Mundiál Saúde (OMS), sesta ne’e, entrega reajente teste monkeypox hamutuk 750 ba Ministériu Saúde (MS) hodi halo prevensaun ba surtu refere iha Timor-Leste.
“Ami entrega reajente teste Monkeypox hamutuk 750 no mós Ekipamentus Protesaun Pesoál (PPE) inklui ekipamentu ICT hanesan komputadór no mákina imprime atu hodi ajuda halo deteksaun no prevene virus monkeypox,” Reprezentante OMS iha Timor-Leste, Arvind Mathur hateten ihaámbitu seremónia atribuisaun reajente hirak ne’e iha edefísiu Ministériu Saúde-Caicoli.
Notísia relevante: Governu hahú prepara estratéjia prevene vírus “monkeypox”
Tuir relatóriu ne’ebé mak relata hosi nasaun membru OMS katak surtu ne’e afetadu ona iha rejiaun neen ho kazu konfrimadu pozitivu monekeypox hamutuk 27.814 no na’in-11 mak mate ona.
Nune’e, nia dehan OMS fó importánsia no alerta inklui apoia nasaun membru OMS nian atu haree ba preparasaun no prontu hodi hasoru surtu monkeypox.
“Ami estende ami nia asisténsia ba Ministériu Saúde ninia preparasaun ba detensaun, prevensaun, rastreiu kontajiu no tratamentu karik iha posibilidade monkeypox tama iha nasaun ne’e,” nia kompromete.
Alende ne’e, OMS apoia mós jeleira malirin hodi teste temperatura no armáriu rai ai-moruk hodi garante ai-moruk iha farmasieútiku iha munisipiu Aileu, Ainaro, Bobonaro, Ermera no Viqueque.
Iha biban hanesan, Ministra Saúde, Odete Maria Freitas Belo agradese ba Organizasaun Mundiál Saúde ne’ebé durante ne’e apoia ekipamentu médiku liuliu reajente ba teste virus monkeypox nian.
“Ita esperénsia ona ho COVID-19, nune’e ita fó kedas ona atensaun ho reajente teste inklui mós ekipamentu protesaun pesoál nian, nune’e agradese ba Organizasaun Mundiál Saúde ba apoia ne’e,” Governante ne’e agradese.
Notísia relevante: OMS apresia preparasaun MS hasoru moras Monkeypox
Jornalista : Felicidade Ximenes
Editór : Florencio Miranda Ximenes
