Ró ambulánsia konsege evakua pasiente na’in-63 hosi Ataúro mai Dili
DILI, 15 agostu 2022 (TATOLI)— Hahú hosi janeiru to’o juñu, Diresaun Nasionál Servisu Ambulánsia no Emerjénsia Médiku, Institutu Públiku (DNSAEM), I.P), hala’o operasaun ba ró ambulánsia hodi evakua pasiente hamutuk 63 hosi Munisípiu Espesiál Ataúro mai halo tratamentu saúde iha Hospitál Nasionál Guido Valadares (HNGV).
Ró ambulánsia ne’ebé oferese hosi Governu Indonézia ne’e konsege evakua pasiente sira ne’ebé sofre dengue no moras Infesaun Vias Respiratóriu Aguda (ISPA) inklui moras sira seluk hosi Ataúro no RAEOA.
Notísia relevante: MS prepara ona ró ambulánsia evakua pasiente hosi Ataúro no RAEOA
“Ita evakua pasiente sira hosi Ataúro mai Hospitál Nasionál Guido Valadares (HNGV) ne’e maioria labarik, ne’ebé sofre dengue no ISPA,” Diretór Jerál SNAEM, I.P, Horacio Sarmento ba Agência TATOLI iha nia kna’ar fatin-Caicoli, segunda ne’e,
Daudaun, ró ambulánsia nafatin halo movimentu bainhira iha pasiente ruma ne’ebé sentru saúde iha Munisípiu Espesiál Ataúro labele halo atendimentu, nune’e bele evakua mai Dili.
“Daudaun ró ambulánsia nia kondisaun di’ak, nune’e pasiente sira presiza evakua urjente ne’e, tempu kalan mós ita atende, maibé depende ba laloran tasi,” nia afirma.
Ró ambulánsia ne’e oferese hosi Governu Indonézia ba Ministériu Saúde ho kapasidade tula pasiente na’in-25 ho velosidade ne’ebé lais liu atu fasilita evakua pasiente-sira hosi Munisípiu Espesiál Ataúro no Rejiaun Administrativu Espesiál Oé-Cusse no Ambeno (RAEOA) hodi mai halo tratamentu saúde iha HNGV.
Ró ambulánsia ne’e sosa ho $200.000 hosi PT.Fiberboat Indonézia no transporta to’o Timor-Leste hosu Surabaya, Java Leste.
Notísia relevante: Indonézia oferese ró ambulánsia ida ba MS
Jornalista : Felicidade Ximenes
Editór : Florencio Miranda Ximenes
