AHDMTL husu apoiu ekipamentu arte no kultura ba SEAK
DILI, 16 agostu 2022 (TATOLI)–Diretór Ezekutivu Asosiasaun Halibur Defisiénsia Matan Timor-Leste (AHDMTL), Gabriel de Sousa, informa Ema ho Defisiénsia (EhD) liuhosi AHDMTL husu apoiu ekipamentu arte no kultura atu dezenvolve EhD nia talentu iha nasionál no internasionál.
“Horisehik, ami Ema ho Defisiénsia hasoru malu ho SEAK hodi ko’alia kona-ba arte no kultura nian. Tanba, ami Ema ho Defisiénsia mós iha talentu, nune’e ami hakarak husu SEAK nia tulun hodi fó apoiu ekipamentu arte no kultura nian,” Gabriel de Sousa hateten ba Agência Tatoli, liuhosi telefónika, tersa ne’e.
Rezultadu enkontru ne’e, nia dehan, SEAK prontu no hakarak duni atu halo koordenasaun no kooperasaun ho AHDMTL liga ba arte no kultura nian.
“SEAK iha kompromisu boot ho ami katak atu servisu hamutuk ho ema ho defisiénsia sira liu-liu defisiénsia matan,” nia dehan.
Aldeinde ne’e, AHDMTL mós husu apoiu orsamentu ba SEAK hodi bele fó insentivu ba formadór sira-ne’ebé mak fó formasaun ba AHDMTL.
“Tanba ne’e mak ita mós hatama proposta osan ba SEAK ho montante rihun $5, atu beles elu ba formadór sira,” nia esplika.
Jornalista : Osória Marques
Editór : Cancio Ximenes
