Konfrontu iha Vila-Verde, Membru PSHT na’in-ida baixa iha HNGV
DILI, 19 agostu 2022 (TATOLI)— Xefe Departamentu Emerjénsia Hospitál Nasionál Guido Valadares (HNGV), Flavio José Baovida, informa kazu konfrontu ne’ebé akontese iha Vila Verde-Dili, sesta (18/08), madrugada, rezulta membru Persaudaraan Setia Hati Terrate (PSHT) na’in-ida hetan kanek grave no dadaun baixa iha sala emerjénsia HNGV hodi halo tratamentu saúde.
Pasiente hirak ne’e, transporta mai iha HNGV iha tuku 5:00, dadeer no ekipa médiku iha Departamentu Emerjénsia HNGV halo kedan tratamentu saúde.
Notísia Relevante: PNTL detein autór na’in-ida ne’ebé so’e bomba molotov iha Comoro
“Ami identifika pasiente na’in-ualu, kompostu hosi feto lima no mane tolu, hosi organizasaun PSHT tanba mai ho farda organizasaun kompletu, ne’ebé dehan ema deskoñesidu mak tuda sira,” nia afirma.
Hosi pasiente na’in-ualu ne’e, nia dehan médiku sira halo ona observasaun katak na’in-hitu ho kondisaun di’ak ne’ebé alta ona no hela na’in-ida mak kondisaun grave no kontinua baixa iha HNGV hodi hetan tratamentu.
Pasiente feto ida ho tinan 21, mak kontinua baixa tanba hetan kanek grave iha parte ulun no raan sai husi inus no tilun, nune’e médiku sira halo ezaminasaun no halo tratamentu hela.
“Kazu tuda malu iha Vila-Verde ne’e la rezulta ema mate, maibé kanek entaun presiza halo tratamentu intensive, hafoin kondisaun di’ak mak bele alta ba uma,” nia afirma.
Notísia Relevante: Gradua membru na’in-8.529, Governu husu PSHT kontribui ba pás-estabilidade
Jornalista : Felicidade Ximenes
Editór : Florencio Miranda Ximenes
