AMB husu empreza aselera projetu edifísiu postu Maliana-Bobonaro
BOBONARO, 24 agostu 2022 (TATOLI) – Prezidente Autoridade Munisípiu Bobonaro (AMB), Ernesto de Oliveira Barreto, husu ba empreza atu aselera projetu konstrusaun edifísiu administrasaun postu administrativu Maliana no Bobonaro ne’ebé tama iha Planu Dezenvolvimentu Integrada Munisipál (PDIM) 2021 ho kategoria tipu projetu klase (A).
Ernesto haktuir, bazea ba kontratu ne’ebé empreza sira asina ho autoridade munisipál ho durasaun hahu hosi fulan-janeiru tinan 2022 no sei remata iha fulan-jullu.
Maibé nia rasik ho ekipa halo supervizaun ba obra rua ne’e hasoru difikuladede oinoin iha mobilizasaun materiál lokál no fabrikadu tanba impaktu hosi situasaun klíma, nune’e autoridade munisípiu nu’udar na’in ba projetu deside estende tan kontratu ba fulan tolu no data derminadu iha fulan-setembru oin mai.
Daudaun ne’e progresu fíziku ba implementasaun obra rua ne’e iha parte administrasaun postu Bobonaro besik tama ona 90%, enkuantu edifísiu postu administrativu Maliana foin mak 70%.
Notisia relevante: Projetu reapropriasaun PDIM tolu iha Bobonaro atinje 60%
“Hakarak ka lakohi sira uza meiu oinsá fulan-tolu ne’e tenke hotu, se setembru agora la finaliza, sei la halo pagamentu no bele mos hapara, tanba ha’u lakoi projetu pasadu to’o agora la hotu, labele halimar hanesan ne’e,” nia informa ba Jornalista sira foin lalais ne’e.
Autoridade masimu iha Bobonaro ne’e dehan, servisu fíziku projetu ne’e atinke 70% sei halo pagamentu ba daruak, depois ninia progresu serbisu atinje to’o 100% mak foin bele halo pagamentu dala-tolu ikus.
Maibé kuandu empreza sira-nia serbisu ne’e atinje de’it 80% autóridade sei labele halo pagamentu no sei la estende bainhira obra ne’e atraza nafatin.
Totál orsamentu hosi kapital dezenvolvimentu ne’ebé Autoridade Munisípiu Bobonaro prevee iha OJE 2021 ba konstrusaun edifísiu administrasaun postu administrativu Maliana ne’ebé responsabiliza hosi empreza lokál Lesuboro Unipesoal Lda ho kustu $141,708.07.
Nune’e mos edifísiu administrasaun postu administrativu Bobonaro ho kustu $ 150,494,05 ne’ebé responsabiliza hosi empreza Bia Basan Mogen Unipesoál Lda.
Notisia relevante: OJE 2022, Bobonaro ezekuta ona 43%
Jornalista: Sérgio da Cruz
Editór: Evaristo Soares Martins
