Top

IGE-MTCI asina MoU harii monumentu Saudozu Nicolau Lobato iha Ermori

Prezidente IGE, I.P, Ermenegilda da Costa Laurentina, troka nota entendimentu ho Diretór Jerál MTKI, Jelino Soares, iha salaun Komisaun Funsaun Públika (KFP), kuarta (24/08). Akordu ne'e ko'alia kona- prosesu konstrusaun monumentu Saudozu Nicolao dos Reis Lobato iha Ermori. Imajen Tatoli/Francisco Sony

DILI, 24 agostu 2022 (TATOLI)—Ministériu Turizmu Komérsiu no Indústria (MTCI) ho Institutu Jestaun no Ekipamentu, Institutu Públiku (IGE, I.P), kuarta ne’e, asina Memorandum of Understanding (MoU) ba prosesu atu harii monumentu Saudozu Nicolau Lobato iha Ermori, postu administrativu Metinaro, munisípiu Dili.

Vise-Ministra Turizmu Komunitária no Kulturál, Inâcia da Conceicão Teixeira, hateten liuhosi asina MoU ne’e bele reforsa liután servisu ne’ebé liga ba estrada, bee, eletresidade hodi nune’e bele halo dezenvolvimentu turizmu komunitária.

Vise-Ministra Turizmu Komunitária no Kulturál, Inâcia da Conceicão Teixeira. Imajen Tatoli/Francisco Sony.

“Ho asina MoU ne’e bele ajuda ami iha dezenvolvimentu turizmu nian, la’ós ba Ermori nian maibé ba fatin seluk tan no MoU ne’e reforsa fali ami-nia kontinuasaun hosi MOP nia servisu ne’ebé halai liu ba estrada,” Vise MTCI ne’e hateten bainhira partispa iha asina MoU kona-ba monumentu Saudozu Nicolau Lobato nian, iha salaun Komisaun Funsaun Públika (KFP), Dili.

Governante ne’e garante katak ho kooperasaun entre entidade rua ne’e bele lori dezenvolvimentu ba povu iha área izoldu sira.

“Ba área turizmu komunitária nian, ha’u fiar katak ho kooperasaun ida-ne’e bele loke dalan ba ami hodi ami iha osan karik bele servisu hamutuk ho IGE ho di’ak liután,” Vise-ministra ne’e hateten.

Prezidente IGE, I.P, Ermenegilda da Costa, hateten ohin IGE, I.P ho MTCI asina MoU maibé durante ne’e servisu ne’e hotu la tama ba IGE, I.P nia planu, maibé iha tempu badak IGE, I.P sei prepara ekipamentu no rekursu, mekániku, enjiñeiru no motorista hodi destaka ba iha ne’ebá.

“Tarde liu, inisiu fulan-setembru ami hahú halo servisu,” nia dehan.

Prezidente Komisaun Funsaun Públika (KFP), Faustino Cardoso, hateten hosi asina MoU ne’e hodi asegura realizasaun ba objetivu prinsipál mak dalan nune’e bele realiza konstrusaun monumentu refere.

“Ohin ita hamutuk ho entidade prinsipál rua mak IGE, I.P ho MTCI sei asina dokumentu importante no Ministériu Obra Públika (MOP) ho KFP sei sai sasin hosi ba asina MoU ne’e, no atu asegura realizasaun ba objetivu prinsipál mak dalan ne’ebé ho distánsia kilometru 4 ho balun ne’e,” Prezidente dehan.

Nune’e, komunidade hosi ne’ebá bele asesu dalan ba merkadu maibé ida-ne’e hanesan inisiu di’ak no hein katak tempu mai sei akontese dezenvolvimentu barak depois halo estrada no monumentu ne’e.

Atividade ne’e parte ámbitu komemorasaun loron funsaun públika ne’ebé liu tiha ona ne’e, nune’e la realiza programa hakat tuir fali ain leut saudozu sira-nian iha momentu ne’ebá tanba ho hanoin ida konklui tiha lai konstrusaun monumentu Saudozu Nicolau dos Reis Lobato no halo inagurasaun ba monumentu ne’e.

Nia hato’o agradesimentu ba Centro Nacional Chega (CNC) disponibiliza ba rekursu, meu, kondisaun no halo ona dezenu to’o iha lokál no identifika fatin hodi ohin realiza asina MoU no tempu badak sei halo konstrusaun monumentu refere.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!