DILI, 25 agostu 2022 (TATOLI)—Xefe Departamentu Tráfiku no Terminál, Abel da Conceição, informa Dirasaun Nasionál Transporte no Terrestre (DNTT) sei halo manutensaun ba semáforu iha Colmera tanba semáforu iha fatin ne’ebá daudaun ne’e avaria.
“Semáforu avaria iha Colmera. Hosi ami-nia tékniku haree ona no sei hameno ninia komponente, tanba dala ruma iha nia laran buat kiik sira iha Dili laran laiha entaun tenke hameno hosi rai-li’ur. Tanba ne’e, sei liuhosi prosesu ida, maibé kuandu sasán to’o mai konserteza sei tau fila-fali ba semáforu no kontinua funsiona normál,” Abel da Conceição hateten ba Agência Tatoli iha nia kna’ar fatin, Dili, kinta ne’e.
Semáforu ne’ebé avaria iha Colmera ne’e dala ruma komponente balun mak falla no sasán sira-ne’e bainhira to’o ona mai mak sei monta no normáliza fali, tanba sasán ne’e tenke sosa iha Indonézia.
“Ekipamentu ba normáliza semáforu ne’e sosa fali iha Indonézia, tanba ekipamentu iha Timor-Leste ne’e laiha. Tanba, tékniku sira kuandu loke halo teste hotu saida mak presiza troka iha laran tau iha apontamentu, depois sira hameno tuir ba kompañia indústria ne’ebé halo iha Indonézia,” nia hateten.
Maske nune’e, nia dehan, ba semáforu ne’ebé daudaun ne’e avaria iha Colmera ne’e durante fulan ida ona.
Entretantu, tuir dadus hosi DNTT katak semáforu iha Díli laran hamutuk 12, kompostu hosi Bidau Lecidere, Estádiun, Ministériu Justisa, Eletrisidade Timor-Leste, E.P, (EDTL), Colmera, Katedrál, Jardim 05 de maio, Palácio Prezidente, Timor-Plaza, Delta, Bidaun Tokoh Baru no Bemori.
Jornalista : Nelia Fernandes
Editór : Cancio Ximenes
