Governu entrega ona subsídiu ba Boxista Delio Mouzinho

DILI, 25 agostu 2022 (TATOLI)– Governu liuhosi Sekretáriu Estadu Juventude no Desportu (SEJD), entrega ona subsídiu ho montante $7.500 ba Boxista hosi El-Matador Boxing Club, Delio Mouzinho, tanba susesu sai segundu lugar iha finál jogu boxe iha Sudeste Aziátiku (SEA Games,sigla Inglés) ba dala-31.
“Governu liuhosi Sekretáriu Estadu Juventude no Desportu (SEJD), fó ka entrega ona subsídiu ho osan $7.500, maibé sira fó de’it $7.000 tanba dehan $500 ne’e koa ba taxa. Ha’u simu osan montante loloos mak $4.500 de’it tanba $2.500 ne’e, SEJD dehan rai metin de’it iha banku bainhira presiza mak bele foti hanesan selu eskola no seluk tan,” katak Boxista Delio ba Agência TATOLI iha kampu Benfica Colmera Dili, kinta ne’e.
Notísia relevante: Delio okupa segundu lugar boxe SEA Games
Enkuantu, nia dehan kona-bá bolsa estudu ne’ebé Governu promote ona atu kontinua nia estudu iha nasaun Cuba seidauk realiza tanba ladauk iha infromasaun ba asuntu ne’e.
“Foin lais ami fila ne’e Governu mak promote ona dehan sei apoiu ha’u ba eskola iha Cuba. maibé to’o agora seidauk rona informasaun. Maske nune’e ha’u hetan ona bolsa estudu iha Institutu Filozofia Fatumeta, entaun ha’u eskola hela iha ne’ebá,” nia afirma.
Notísia relevante: Delio Anzaqeci “tuku monu” Boxista Kamboja iha ronde daruak
Ho asuntu ne’e Agência TATOLI tenta konfirma ho parte SEJD liuliu diresaun ne’ebé trata asuntu ba ida ne’e okupadu hela ho servisu esensiál balun, nune’e seidauk bele fó komentáriu no hein tempu seluk mak foin bele fó informasaun tanba buat hotu sei iha prosesu nia laran.
Notísia relevante: Boxista Timor-Leste halakon Malázia iha SEA Games
Boxista Delio hetan bolsa estudu hosi ISFIT
Jornalista: Hortencio Sanchez
Editór : Florencio Miranda Ximenes

