DILI, 26 agostu 2022 (TATOLI)—Ministériu Solidariedade Sosiál no Inkluzaun (MSSI) liuhosi Dirasaun Nasionál Direitu no Promosaun ba Ema ho Defisiénsia (DNDPED) observa katak fatin asesivel hodi responde ba nesesidade Ema ho Defisiénsia (EhD) atinje ona 50%.
Notísia Relevante: CGT: OJE 2022 tenke asesivel no inkluzivu ba ema ho defisiénsia
“Ha’u observa katak fatin asesivel ba ema ho defisiénsia iha ona progresu mak ninia atinjimentu 50%. Ne’e iha área balun iha sidade Dili estabelese ona hanesan rampa no lift atu sira bele asesu,’’ Diretor Dirasaun Nasionál Direitu no Promosaun ba Ema ho Defisiénsia (DNDPED), Mateus da Silva, hateten ba Agência Tatoli, iha nia kna’ar fatin, Caicoli, Dili, sesta ne’e.
Program ida-ne’e aliña ho Governu nia Planu Asaun Nasionál (PAN) ne’ebé tenke implementa hosi liña ministeriál sira.
Tuir polítika Oitavu Governu nian, programa refere sei implementa hosi MSSI, Sekretáriu Estadu Juventude Desportu, (SEJD), Ministériu Transporte no Telekomunikasaun (MTK), Ministériu Ensinu Superiór Siénsia no kultura (MESSK), Ministériu Saúde (MS), Ministériu Justisa (MJ), Sekretáriu Estadu Igualdade Inkluzaun (SEII), Ministériu Finansa (MF) no seluk tan.
“Tuir ami-nia observasaun katak, ministériu balun hanesan MF, MSSI, MTK, MF no SEJD mak estabelese ona rampa no lift atu bele ema no defisiénsia sira mós bele asesu ho hala’o kna’ar no hanesan ema lahó defisiénsia sira,” nia dehan.
Aleinde ne’e, Mateus da Silva hateten tuir planu Governu nian, presiza tebes atu estabelese ponte iha arreadór sira besik ba ema ho defisiénsia sira sempre asesu.
“Hanesan iha arreadór MSSI, Asosiasuan Defisiénsia Timor-Leste (ADTL), Asosiasaun Halibur Defisiénsia Matan Timor-Leste (AHDMTL), arreadór Asosiasaun Espesiál ba Olímpiku ba Ema ho Defisiénsia iha Becora no seluk tan,” nia esplika.
Notísia Relevante: Despaisu MOP orienta konstrusaun públiku akomoda asesibilidade ema ho defisiénsia
Jornalista : Osória Marques
Editór : Cancio Ximenes
