Top

Rekonsiliasaun maibé povu presiza harii estabilidade polítika-garante dezenvolvimentu

Leandro Isaac kua keek. Imajen/Espesial.

DILI, 29 agostu 2022 (TATOLI)–Líder Rezisténsia no Reprezentante Conselho Nacional de Resistência Timorense (CNRT), Leandro Isaac, hateten to’o agora timoroan iha Timor Osidentál no iha Timor-Leste ne’e, rekonsilia no hadomi malu hela maibé buat ne’ebé povu presiza mak harii estabilidade polítika rai-laran no garante dezenvolvimentu.

Notísia Relevante: Leandro Isaac: “Atu garante estabilidade presiza líder transparénsia”

“Tanba de’it polítika to’o ohin loron ita sei ko’alia nafatin rekonsiliasaun. Rekonsiliasaun entre povu iha hela, buat ne’ebé povu presiza mak harii estabilidade polítika rai-laran no garante dezenvolvimentu nasionál,” Leandro Isaac hateten ba Agência Tatoli liuhosi telefónika.

Atu halo rekonsiliasaun ho timoroan iha Timor Osidentál (NTT; Atambua no Kupang) ne’e, nia dehan, povu laiha problema maibé autór krime grave mak labele, tanba krime ne’ebé sira komete iha momentu 1999, Organizasaun Nasaun Unida (ONU) mak kaer iha momentu ne’ebá, entaun sira-ne’e hamutuk 401 ne’e labele sai hosi indonézia.

“Ho ida-ne’e, ita tenke buka servisu ho Nasaun Unida atu oinsá mak Nasaun Unida dada (tarik) fila-fali ba ema hamutuk 401 ne’ebé komete krime no seidauk tuir prosesu judisiál. Bainhira ha’u hasoru malu ho sira hakuak ha’u no ami ko’alia malu di’ak de’it, to’o ami konta istória 1999 nian ba malu, iha Atambua-Kupang. No, sira rasik dehan rekonsiliasaun nia follow up laiha ne’e. Ida-ne’e ema ezize susar ne’e iha ne’e,” nia hateten.

Notísia Relevante: Mamar hanesan bee halo Indonézia susar sobu povu nia segredu

Ba ema hirak ne’ebé liman raan ka foer hasoru povu iha 1998 no 1999, ida-ne’e povu sei sente no la’ós tan ida-ne’e mak ita fila kotuk ba malu maibé povu hadomi malu hela.

“Ezemplu kiik mak ha’u, bainhira ha’u ba Timor osidentál, Eurico Guterres mai buka ha’u no ami rua konta istória iha momentu nia asaltu ha’u-nia uma iha Lahane, iha 17 abril 1999,” nia haktuir.

Nia dehan, labele ko’alia iha ne’ebá maibé mai iha Timor mak ko’alia no tau sasán iha ida-idak nia fatin, tanba ne’e mak justisa tenke tau iha nia fatin no polítika tau iha nia fatin no ida-ne’e mak foin loos.

Tanba ne’e, nia hatutan, di’akliu hamutuk atu buka dalan saida de’it para dehan independénsia ne’e justu duni hodi fó garantia moris di’ak ba povu nia moris loron aban.

“Ida-ne’e mak ha’u husu ba povu tomak atu matan moris neon na’in, hili lialoos no tau lia falsu ba kotuk,” nia dehan.

Notísia Relevante: Xanana Gusmão: “Ita na’in-rua nia diferensa sei hanaruk povu nia sofrimentu”

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!