Mákina avaria, HNGV la atende pasiente fase-raan
DILI, 31 agostu 2022 (TATOLI)— Hospitál Nasionál Guido Valadares (HNGV), liuhosi Departamentu Hemodiálize, tersa (30/08), hahú la fó atendimentu ba pasiente sira ne’ebé presiza fase raan tanba mákina avaria.
“Mákina fornese bee ka planta de agua ba makina fase raan mak avaria ka aat, ne’ebé halo mákina tomak fase raan nian labele funsiona hodi fó atendimentu ba pasiente sira,” Diretór Administrasaun Finansa no Lojístika iha Hospitál Nasionál Guido Valadares (HNGV), Raul Humberto Gama, hateten ba Agência TATOLI via telefónika, kuarta ne’e.
Mákina ne’ebé mak fornese bee ba mákina fase-raan iha HNGV iha unidade ida de’it, nune’e la sufisiente ka laiha kapasidade atu atende mákina fase-raan ho unidade 12.
Bainhira mákina ne’e avaria,HNGV haruka kedan kompaña Inti Sumber atu sosa urjente ekipamentu ne’e iha Indonézia, nune’e iha loron sesta bele to’o iha Timór atu halo manutesaun ba mákina ne’e.
“Ita nia tarjetu ba ekipamentu ida ne’e, tenke to’o iha sesta atu halo kedan manutensaun, hodi semana ne’e laran, mákina fase raan tenke di’ak hodi fó tratamentu ba pasiente fase raan sira,” nia promote.
Médiku Espesialista sira iha HNGV fó ona instrusaun ba pasiente fase raan sira atu pasiente sira evita hemu bee barak hodi hein prosesu manutesaun mákina ne’e.
“Tuir ita nia médiku espesialista sira katak iha buat ruma ba pasiente sira bele foti alternativu seluk, maibé daudaun fó instrusaun ba pasiente sira atu prevene hemu bee barak hodi aguenta no hein manutesaun hotu mak bele fase sira nia raan,” katak Diretór ne’e.
Notísia relevante: HNGV rejista pasiente fase-ran 22 no mate na’in-haat
Jornalista : Felicidade Ximenes
Editór : Florencio Miranda Ximenes
