CI husu jornalista timoroan fó valór ba jornalista mate iha TL

Dili, 01 Setembru 2022 (TATOLI)—Prezidente Konsellu imprensa (CI), Virgílio da Silva Guterres, husu ba jornalista timoroan sira atu fó valór ba sakrifísiu jornalista sira-ne’ebé mate liu-liu ba kauza independénsia Timor-Leste nian.
Virgílio hato’o pedidu ne’e relasiona ho jornalista sira-nia mate entre fulan agostu no dezembru tinan 1999, jornalista Greg Shackleton, Tony Stewart, Brian Peters, Malcolm Rennie iha Gary Cunningham iha Balibo no Agus Mulyawan iha Indonézia mate iha Lospalos no sira seluk tan.
“Jornalista sira ohin loron tenke garante kualidade notísia nian ba sosiedade hanesan Max Stahl, ne’ebé laiha interrese pesoál maibé atu buka lia-loos,” Prezidente CI hateten ba Agência Tatoli iha nia kna’ar fatin, Quintál Boot, Dili, kinta ne’e.
Tanba ne’e, nia husu ba jornalista sira tenke hato’o informasaun ho imparsialidade liuhosi servisu jornalista nian atu dada ema nia fiar.
CI nu’udar instituisaun Estadu nian, nune’e nia valoriza jornalista sira ho kompetisaun ba Adelino Gomes, Borja da Costa, no sira seluk, tinan-tinan ba servisu jornalístika textu, vídeo no fotografia sira.
Nune’e, CI sei aloka nafatin orsamentu atu fó ba manán-na’in sira-nia prémiu ba jornalista no fotógrafu timoroan sira.
Ho ne’e, Prezidente CI apela ba jornalista hotu-hotu atu kontinua kumpre kódigu étika jornalístika iha rekolla no públika notísia.
Jornalista : Osória Marques
Editór : Cancio Ximenes

