BOBONARO, 01 outubru 2022 (TATOLI)- Estasaun Kombustível Abomkase Fuels, ne’ebé lokaliza iha suku Holsa, postu administrativu Maliana, munisípiu Bobonaro, desdide taka provizóriu tanba kauza hosi minal ilegál kontinua tama hosi Atambua, Belu, provínsia Nusa Tenggara Timur (NTT), Repúblika Indonézia.
Diretór Abomkase Fuel, José Pires esplika, atividade ilegál kontinua buras, tanba daudaun ne’e osan dolar troka ba rupiah hetan fali montante aas-liu.
Ne’e duni negosiante kiik sira fa’an mina ho folin baratu kompara ho mina legál iha estasaun kombustível sira.
Emprezáriu ne’e argumenta, daudaun ne’e presu mina iha merkadu mundiál sa’e maka’as kada loron, ne’e duni setór privadu sira-ne’ebé hetan lisensa hosi governu labele kompete ho negosiante ki’ik sira tanba la selu taxa ba estadu kada fulan.
Notisía relevante: UPF Apreende Mina Ilegál Tonelada 37, Karreta Tolu no Motor Ualu
“Ha’u sosa iha ne’ebá, ezmplu 1 litru iha ne’e ita fa’an $1,76, ema fa’an $1 ita atu manán saida, ema atu hola konserteza sosa ida $1 ne’e,” nia informa ba Jornalista sira, iha kna’ar-fatin bairru Culo, Holsa, Maliana, kinta ne’e.
Pires subliña, tinan ida estasaun kombustível Abomkase kontrubui selu taxa $1.000,00 ba ANPM no Autoridade Tributaria munisípiu Bobonaro $30 to’o $40 kada fulan.
Nia husu ba Autoridade Nasionál Petróleu no Minerál (ANPM) no Ministériu Finansa liuhosi Autoridade Tributária munisípiu Bobonaro, atu halo kontrolu iha terrenu hodi identifika negosiante ki’ik sira.
“Sé hanesan ne’e beibeik, ha’u nafatin taka tanba ne’e ha’u-nia privadu, sé Estadu la haree la problema ha’u selu taxa nafatin, tanba ha’u lakohi lakon, maibé ha’u lakon ba estadu la problema,” nia fundamenta.
Nia mós husu ba autoridade munisípiu Bobonaro atu orienta Polísia Nasionál Timor-Leste (PNTL) identifika negosiante ki’ik sira-ne’ebé sosa mina ilegál hosi Indonézia ne’e.
Notísia relevante: Ekipa konjunta halo apreensaun mina ilegál tonelada hitu hosi Atambua
Iha Fátin ketak, Sekretáriu Autoridade munisípiu Bobonaro, João Fátima do Carmo, reforsa iha loron rua ba kotuk to’o agora transporte públiku sira barak mak buka mina tanba negosiante ki’ik sira-ne’ebé fa’an iha dalan-ninin mós laiha ona estoke.
“Kestaun mak transportasaun kombustível hosi sentrál mak mai munisípiu Bobonaro mak menus, ninia problema ne’e sirkulasaun kombustível ne’e afeta ba mundu tomak inklui Timor-Leste,” nia afirma.
Nia dehan, autoridade munisípiu laiha kompenteñénsia atu halo intervensaun ruma tanba problema ne’e afeta mundu tomak.
“Maibé ami nafatin tenta halo liña koordenasaun ho parte Governu Sentrál oinsa halo atendimentu ba ita-nia públiku, liuliu ba ita-nia mákina estadu atubele apoiu serbisu ligadu ho kombustível durante ne’e transporta hosi Dili,” nia katak.
Tuir observasaun Agência Tatoli iha terrenu nota katak, dezde semana kotuk to’o agora negosiante ki’ik sira fa’an mina iha estrada públiku, hahú hosi área Soso, Holsa, bairru Maravilha, merkadu sentrál Maliana no suku Lahomea.
Enkuantu informasaun seluk ne’ebé Tatoli rekolla iha terrenu, hafoin taka atividade durante loron rua, daudaun ne’e estasaun kombustível Craçia ne’ebé lokaliza iha área Rai-Mean, suku Raifun, postu administrativu Maliana, halo hela atendimentu ba públiku ho estoke tonelada 10, kompostu hosi gazoel tonelada lima 5 no gazolina tonelada lima.
Notísia relevante: Folin kombustível iha estasaun iha mudansa kada semana
Jornalista: Sérgio da Cruz
Editór: Evaristo Soares Martins
