Komunikasaun FFTL ho LFTL ladun armonia hodi realiza liga époka 2022-2023

DILI, 03 setembru 2022 (TATOLI)—Kalendáriu ne’ebé fó sai iha fulan-rua ba kotuk katak jogu ba Liga Timorense époka 2022-2023 sei realiza iha 18 agostu liubá, maibé tanba komunikasaun entre Federasaun Futeból Timor-Leste (FFTL) no Liga Futeból Timor-Leste (LFTL) inklui klube sira ladun armonia, nune’e to’o agora seidauk realiza liga ne’e.
Ho situasaun ne’e, jogadór sira hosi klube primeiru no segundu divizaun iha liga timorense sente triste no lamenta tanba bele hamate sira nia talentu iha mundu futeból, bainhira la realiza liga époka ne’e.
Notísia relevante: 18 agostu, LFTL abertura jogu primeiru no segundu divizaun époka 2022
Jogadór klube DIT FC, José Santos, sente triste bainhira FFTL no LFTL ladun iha komunikasaun di’ak no la koopera hamutuk hodi buka solusaun atu realiza jogu époka ne’e.
Jogadór ne’e husu ba parte rua atu tuur hamutuk hodi buka solusaun, nune’e jogu bele realiza lalais iha tempu besik tanba jogu la la’o ne’e jogadór no klube mak sai vítima tanba moris depende ba futeból.
“La joga kle’ur sente ladun di’ak, ne’ebé parte rua tenke haree oinsá bele tuur hamutuk hasai kalendáriu ida fiksu fó ba klube sira atubele realiza jogu iha tempu besik, karik iha lakuna balun entre parte rua tenke buka malu hodi resolve, sé sira dada malu bebeik ami mak sai vítima”, dehan jogadór selesaun nasionál seniór ne’e ba Agência TATOLI iha kampu FFTL-Dili, sábadu ne’e.
FFTL no LFTL tenke fó sai ona kalendáriu fiksu atu klube sira bele halibur ona jogadór sira hodi halo treinamentu hamutuk. “Se la’e klube sira seidauk bele halibur ami tanba liga seidauk serteza, ida ne’e fó impatu maka’as mai ami nia kareira hanesan jogadór”, nia relata.
Iha sorin seluk, kapitaun selesaun nasionál U-23, hanesan mós jogadór prinsipál klube AD SLB Laulara, Filomeno Junior, hateten triste tanba liga seidauk la’o to’o agora. “Ami triste tebes, liga la la’o to’o agora ne’e, besik ona 2022 nia rohan, mais liga nunka la’o, liga ne’e tenke la’o tanba ami jogadór selesaun nasionál atu hatudu rezultadu di’ak iha jogu internasionál iha ita nia rai laran tenke iha jogu ruma para ami book-an bebeik sé la’e ne’e arraska”, nia afirma.
Durante ne’e, nia dehan jogadór barak mak halimar de’it iha uma ne’e, nia-sente ladun di’ak, nune’e lori jogadór hotu nia naran husu ba parte rua ne’ebé toma konta ba liga atu aseleira lalais prosesu hodi realiza liga époka ne’e.
Notísia relevante: FFTL husu LFTL koopera realiza liga futeból époka 2022
Entretantu, jogadór hosi klube Primeira Divizaun LFTL, AD SLB Laulara, Filomeno Juniór da Costa, triste tanba FFTL no LFTL seidauk foti desizaun sériu realiza liga époka 2022. “Hanesan jogadór ida ha’u sente triste tanba desizaun hosi FFTL no LFTL seidauk klaru atu realiza liga tanba jogadór ami tenke book an hela de’it hodi hametin prestasaun”, nia preokupa
Tanba ne’e kapitaun selesaun nasional U-23 ne’e husu ba FFTL no LFTL atu buka malu tuur ko’alia ho klube sira nune’e bele hala’o jogu iha agostu nia laran.
Jogadór hosi klube Assalam FC, Dom Braz, mós sente triste bainhira liga seidauk komesa beibeik tanba kontribui ba hatun sira nia presasaun hanesan jogadór. “Durante ne’e, FFTL ho LFTL fó sai ona atu liga ne’e hala’o iha 18 agostu, maibé ita haree tempu ne’e besik loos ona. Nune’e hanesan jogadór ami sente la di’ak bele hatun ona ami nia prestasaun”, katak.
LFTL sei halibur klube
Entretantu, Prezidente LFTL, Nilton Gusmão, hateten LFTL nia pozisaun firme atu realiza liga futeból iha époka 2022-2023, nune’e semana oin, hahú komunika klube futeból sira hodi diskute ba preparasaun realiza liga futeból Timorense ne’e.
Notísia relevante: Semana oin, LFTL komunika klube futeból realiza liga époka 2022-2023
“Ami iha vontade tebes atu realiza liga iha tinan ne’e, maibé iha impedementu oituan, nune’e ami sei tuur hamutuk ko’alia oinsá bele realiza liga, tempu besik sei komunika ho klube sira atu rona sira nia hanoin kona-ba realiza liga ne’e no haree hamutuk problema sira ne’ebé ita hasoru hela”, katak Nilton Gusmão ba jornalista-sira iha Estádiu Munisipál Dili, kinta ne’e.
Pozisaun LFTL nian mak prontu no kontinua mantein nafatin situasaun servisu iha área futeból hodi bele realiza liga époka ne’e.
Hataan ba deklarasaun FFTL nian, ne’ebé antes ne’e husu LFTL tenke buka rasik osan 50% atu realiza liga tanba SEJD no FFTL tau ona 50%, Nilton dehan hanesan tinan lima ba kotuk realiza liga presiza osan rihun $700-resin.
SEJD-FFTL sei aloka $400.000
Prezidente FFTL, Francisco Martins da Costa Pereira Jerónimo, antes ne’e hateten hahú ko’alia ona ho Sekretáriu Estadu Juventude no Desportu (SEJD) kona-ba finansiamentu , nune’e garante sei realiza liga futeból époka 2022-2023.
“Ha’u hasoru malu ona ho Sekretáriu Estadu Juventude no Desportu (SEJD) hodi ko’alia kona-ba orsamentu atu realiza liga ne’e. Ami (FFTL) sei tau $200.000 no Sekretáriu Estadu Juventude no Desportu (SEJD) tau $200.000,” Prezidente FFTL ne’e hateten ba Agência TATOLI iha Muséu Rezisténsia-Caicoli, kinta ne’e.
Nune’e, Prezidente FFTL ne’e dehan orienta ona tékniku sira atu hahú kontaktu ho Liga Futeból Timor-Leste (LFTL) atubele haree hamutuk data fiksu ba realizasaun liga futeból époka 2022.
“Tanba ita hakarak liga ne’e tenke la’o iha fulan agostu ne’e, maibé depende ba servisu tékniku sira ninian,Tanba ne’e husu ba parte LFTL tenke pronunsia buat ruma oinsá atu realiza liga iha tempu besik”, nia afirma.
Notísia relevante: Assalam preokupa FFTL-LFTL seidauk deside data realiza liga époka 2022
Jornalista: Hortencio Sanchez
Editór : Florencio Miranda Ximenes

