Forensik halo autópsia ba mate-isin JB besik finaliza ona

DILI, 04 setembru 2022 (TATOLI)—Xefe Departementu Forensik iha Hospitál Nasionál Guido Valadares (HNGV), Nilton Tilman, informa médiku sira hosi parte forensik halo autópsia ba mate-isin JB ne’ebé mate ho kondisaun fiu eletrisidade iha kakorok, iha sela detensaun polísia ne’e besik finaliza ona.
Notísia Relevante: Rejeita mate tanba tara-aan, família matebian husu PNTL fó sai rezultadu autópsia
“Ita besik finaliza ona autópsia. Tanba ita iha loron rua feriadu maibé kuandu tama fali ita bele finaliza ona prosesu autopsia,” Xefe Departementu Forensik iha Hospitál Nasionál Guido Valadares (HNGV), Nilton Tilman, hateten ba Agência Tatoli, liuhosi telefônika, domingu ne’e.
Rezultadu autopsia ne’e, hosi parte forensik sei submete ba Ministériu Públiku no Ministériu Públiku mak sei deklara rezultadu outópsia ne’e.
Portavós Komandu Jerál Polisia Nasionál Timor-Leste (PNTL), Superentidente Xefe Armando Monteiro, hateten rezultadu outópsia ba kazu sidadaun ne’ebé mate ho kondisaun fiu eletrisidade iha kakorok, iha sela Komandu PNTL munisipiu Dili ne’e, médiku forensik sei la submete mai iha PNTL.
“Rezultadu otópsia ba sidadaun ne’e (….), médiku sira la submete ba iha PNTL, maibé médiku sira sei komunika no submete direta ba Ministériu no Ministeriu Públiku mak sei anúnsia nia rezultadu,” Komandu Jerál PNTL, Superentidente Xefe Armando Monteiro hateten.
Hatan kona-ba informasan ne’ebé hateten, iha membru polisia ida entrega an ona ba parte família liga ho kazu ne’e, portavós Komandu Jerál PNTL, Superentidente Xefe Armando Monteiro, hateten, nia parte desmente informasaun ida-ne’e.
“Informasaun ne’e laloos. Ha’u husu ba públiku labele rona boatu sira-ne’ebé mak espalla iha mídia sosiál ne’e,” Portavós Komandu Jerál PNTL ne’e hateten.
Notísia Relevante: Ekipa konjunta hahú rekolla evidénsia ba kazu tara-aan iha sela detensaun polísia
Jornalista : Natalino Costa
Editór : Cancio Ximenes

