Sarani Baucau partisipa másima misa agradesimentu Kardeál iha Tasi-tolu
DILI, 06 setembru 2022 (TATOLI)— Sarani lubun hosi Dioseze Baucau partisipa másima misa agradesimentu no resesaun ba Don Virgílio Kardeál do Carmo da Silva, SDB, iha João Paulo II, Tasi-Tolu-Dili, ne’ebé hahú iha tuku 16:05 to’o ramata.
Notísia relevante: Eminénsia Don Virgílio Cardeal konvida sarani moris tuir Maromak nia santuáriu
Katekista Buibau, hosi Dioseze Baucau, Joana Hornai Neto (tinan 80), hateten sente orgullu partisipa misa agradesimentu ne’e, maski ho grupu hala’o viajen dook, maibé la sente kolen.
“Ha’u ferik ona no agora ha’u iha idade 80, ha’u la senti kolen no baruk bainhira hala’o viajen iha karreta laran hamutuk ho ha’u-nia grupu husi Baucau mai. Tanba ami kontente tebes, timoroan ida ba dahuluk bele sai Cardeal ka bibi-atan ba sarani katólika Timor,” Katékista ne’e hatenete nia relata ho antuziasmu.
Ho misa agradesimentu ne’e, nia dehan nakonu ho domin Maromak nian, nune’e husu ba sarani tomak liuliu joven sira atu hadomi malu iha grasa Maromak-nian.
“Ha’u agradese barak ba Maromak domin laran luak, Virjen Santísima Maromak inan, ha’u agradese no husu ba joven sira kolabora netik fó fuan no laran hadomi ita-nia igreja, hadomi ita-nia kna’ar nu’udar sarani di’ak, nu’udar katólika di’ak, hodi lori Timor sai nasaun relijiozu ne’ebé di’ak, iha pás no armónia iha mundu no hakribi violénsia,” nia fó hanoin.
Iha biban hanesan, Sarani hosi Parókia Kaibada, Regina Soares (tinan 60) hosi Baucau mós espresa nia sentimentu orgullu bainhira partisipa misa agradsimentu ida-ne’e.
“Ha’u ho ha’u-nia família sira sente kontente tanba halo viajen hosi Baucau to’o mai iha-ne’e hodi paritisipa misa agradesimentu ne’ebé dirije hosi Cardeal rasik,” nia katak.
Sarani hosi Parókia Baguia, Ester Ximenes (tinan 85), hateten maski ho ain ne’ebé nakdedar, liman ne’ebé namkurut tanba idade avansadu ona, maibé lakohi lakon mós oportunidade hodi fó ninia pasu hodi partisipa misa agradesimentu ne’e.
“Ha’u husu ba bei-oan sira atu hamutuk ho ha’u mai akompaña misa tanba ita iha Cardeal foun no ami kontente,” nia hateten ho lian nakdedar.
Entretantu, Eduardo Gregório Sarmento (tinan 58), hosi Parókia Santa Tereziña Quelicai mós espresa ninia sentimentu ksolok bainhira partisipa misa agradesementu ne’e.
“Ami ho kontente tebe-tebes tanba Timor-Leste ba dahuluk hetan Cardeal foun, nune’e ami espera ho prezensa Cardeal foun ne’e bele ajuda lori nafatin povu Timor sai sarani ne’ebé di’ak,” nia afirma.
Tuir observasaun jornalista Agência TATOLI iha terrenu, nota katak misa ne’e hetan partisipasaun másimu sarani lubun hosi Dioseze Dili, Baucau no Maliana inklui seguransa másima hosi Polísia Nasionál Timor-Leste (PNTL).
Notísia relevante: Prezidente PN: povu sente orgullu ba Don Virgílio sai Kardeál dahuluk iha TL
Jornalista : Arminda Fonseca
Editór : Florencio Miranda Ximenes
