MAE haruka ona proposta misaun Guiné-Bissau ba MNEK

DILI, 07 setembru 2022 (TATOLI)—Ministru Administrasaun Estatál (MAE), Miguel Pereira de Carvalho, hateten MAE haruka ona proposta misaun Guiné Bissau nian ba Ministériu Negósiu Estranjeiru no Kooperasaun (MNEK) atu nomea ema-ne’ebé hola parte atu apoia prosesu resensiamentu eleitorál iha Guiné-Bissau.
“Proposta ba misaun iha Guiné Bissau, ha’u haruka ona ba Ministra Negósiu Estranjeiru no Kooperasaun, Adalzija Magno, para bele nomeia ona ema ne’ebé mak abanbainrua atu hola parte no atu apoia prosesu resensiamentu eleitorál iha Guiné-Bissau,” Governante ne’e hateten ba Agência Tatoli, hafoin reuniaun Konsellu Ministru, iha resintu Palásiu Governu, Dili, kuarta ne’e.
Husu kona-ba se mak atu nomeia ba xefe ba misaun Guiné Bissau, governante ne’e hatán seidauk bele ko’alia sai maibé sei ko’alia bainhira despaixu fó sai ona.
Tuir dekretu Governu númeru 23/2022, iha publikasaun Jornál da Repúblika, artigu 5 ko’alia kona-ba organizasaun ne’ebé hakerek iha artigu ida-ne’e Diretór ida mak dirije, asiste hosi Vise – Diretora ne’ebé mak atende nia iha nia aujénsia no impedimentu iha territóriu Repúblika Guiné – Bissau nian.
Diretór ierarkia subordinadu ba Diretór, aleinde ne’e Diretór no vise sira hetan nomeasaun hosi Diretór no Diretór sira hosi Sekretariadu Tékniku Administrasaun eleitoral nian, ho orden hosi membru Governu ne’ebé responsavél ba polítika externa no kooperasaun internasionál ho proposta hosi membru Governu ne’ebé tutela hosi Administrasaun Estatál.
Antese ne’e, Diretór Sekretariadu Tékniku Administrasaun Eleitoral ( STAE ), Acilino Manuel Branco , hateten Governu sei deside Misaun Xefe Unidade atu apoia prosesu resensiamentu eleitorál iha Guiné-Bissau iha tinan 2022.
Governu aprova kriasaun misaun apoiu prosesu resensiamentu eleitorál Guiné-Bissau.
“Ami espera katak instituisaun rua, Ministru Negósiu Estranjeiru no kooperasaun (MNEC) ho Administrasaun Estatál (MAE) ne’ebé estabelese ona orden nomeasaun iha lideransa Unidade nian atu hala’o sira-nia kna’ar tuir Dekretu-Lei Governu Númeru 23/2022 atu apoia prosesu resensiamentu eleitorál iha Guiné-Bissau.
Jornalista : Osória Marques
Editór : Cancio Ximenes

