DILI, 08 setembru 2022 (TATOLI)—Jestór Programa Nasaun Unida ba Dezenvolvimentu (PNUD), Tito Filipe, hateten projetu konstrusaun edifísiu ba Sekretariadu Téknika Administrasaun Estatál (STAE) foun ba munisípiu Covalima, Manatuto no Viqueque ho montante millaun $1,2.
“Reabilitasaun ba edifísiu STAE nian iha Munisípiu Aileu, Ainaro, Bobonaro, Dili, Baukau, Liquiça no Lautém ho rihun $180,” Tito Filipe hateten ba Tatoli iha nia kna’ar fatin Kampaun Caicoli, segunda semana ne’e.
Sorin seluk, Diretór Jerál STAE, Acilino Manuel Branco, hateten parseiru UNDP mak hahú konstrui no re-abilita edifísiu iha munisípiu sira.
“Apoiu boot liu ne’e hosi parseiru sira foka ba infraestrutura. Nune’e UNDP hahú rehabilita edifísiu STAE nian hotu iha nasaun ne’e, maibé edifísiu nasionál no Baucau hahú ona re-abilita,” Acilino hateten.
Tuir nia apoiu re-abilitasaun ne’e mós hetan apoiu hosi ajénsia kooperasaun internasionál Korea no Governu Japaun nian, liuhosi UNDP fó ona osan millaun $4, hodi apoia eleisaun ikus ne’e no ajuda mós halo konstrusaun edifísiu STAE no CNE nian.
Jornalista : Osória Marques
Editór : Cancio Ximenes
