Top

FFTL no LFTL enfrenta problema finanseiru realiza liga futeból époka 2022-2023

Lideransa órgaun Futeból Timor-Leste liuhosi Federasaun Futeból Timor-Leste (FFTL) no Liga Futeból Timor-Leste (LFTL), realiza enkontru koordenasaun hodi diskute orsamentu ba realizasaun liga Timorense époka 2022-2023. Imajen/Hortencio Sanchez

DILI, 12 setembru 2022 (TATOLI)–Lideransa órgaun Futeból Timor-Leste liuhosi Federasaun Futeból Timor-Leste (FFTL) no Liga Futeból Timor-Leste (LFTL), segunda ne’e, realiza enkontru koordenasaun hodi diskute orsamentu ba realizasaun liga Timorense époka 2022-2023.

Maski, iha reuniaun órgaun reguladór rua ne’e, iha ona konkordansia atu realiza liga Timorense, maibé orsamentu seidauk sufisiente atu finansia atividade eventu futeból ne’e.

Notísia relevante:  SEJD-FFTL sei aloka $400.000 realiza liga époka 2022

Hafoin enkontru koordenasaun ne’e, Prezidente FFTL, Francisco Martins da Costa Pereira Jerónimo, ba jornalista sira hateten enkontru iha ona konkordansia atu haruka karta ba Sekretariu Estadu Juventude no Desportu (SEJD), nune’e bele aumenta tan orsamentu balun tanba fundu ne’ebé iha la sufisiente atu realiza liga Timorense.

Prezidente FFTL, Francisco Martins da Costa Pereira Jerónimo no Prezidente LFTL, Nilton Telmo Gusmão, hala’o konferénsia imprensa iha edifísiu FFTL-Dili.Imajen/Hortencio Sanchez

“Ami ho LFTL ko’alia loos ona, maibé ho orsamentu ne’ebé iha seidauk to’o atu realiza liga mak ami deside, aban (10/09)), haruka karta ida ba Governu hodi husu tan apoiu uitoan,” dehan Prezidente FFTL, Francisco Jerónimo, iha edifisiu FFTL -Dili, segunda ne’e.

Nia dehan, liga ne’e parte rua seidauk deside atubele realiza tanba problema finanseiru. “Ami sei ko’alia ho SEJD mak sei informa fali ba públiku tanba ami nia hakarak liga tenke la’o iha tempu besik,” nia dehan.

Notísia relevante: LFTL hein desizaun FFTL realiza liga époka 2022

Maski nune’e, Prezidente FFTL ne’e garante katak sei buka meiu hotu, nune’e liga époka ne’e tenke la’o iha tinan ne’e.

‘“Ami nia kompromisu, futeból tenke la’o ba oin, liga tenke hala’o, karik Governu la fó apoiu orsamentu másimu, ami konkorda ona sei tuur hamutuk fali ho klube sira haree oinsá liga tenke la’o,” katak nia.

Iha biban hanesan, Prezidente LFTL, Nilton Telmo Gusmão, reforsa FFTL iha kompromisu ne’ebé hanesan. “Ita agora iha hela situasaun ida falta orsamentu, ne’e mak hanoin ida hosi Prezidente FFTL atu hasoru malu ho SEJD atu haree posibilidade sira ne’e, tanba planu orsamentu ami halo hotu ona, maibé seidauk to’o ne’e mak ami buka hela meiu seluk,” dehan Nilton.

Maske, Governu liuhosi Sekretáriu Estadu Juventude no Desportu (SEJD) aloka ona orsamentu $200,000, hosi Federasaun Futeból Timor Leste (FFTL) $200,000 no LFTL mós iha fundu purvolta rihun $140, maibé la sufisente nafatin hodi bele realiza Liga futeból Timorense ne’e.

Orsamentu la sufisente, Prezidente LFTL ne’e dehan tanba klube iha primeira divizaun hakarak subsídiu ba taxa liga timorense ho montante $40.000 no segundu divizaun hakarak $20.000, nune’e presiza tan orsamentu ho montante purvolta $500.000 atu realiza liga ne’e.

Molok ne’e, Liga Futeból Timor-Leste (LFTL), loke ona janela transferénsia ba klube 19 ne’ebé hamahan-an iha LFTL hodi halo rejistu ba jogadór, nune’e bele partisipa iha liga époka ne’e tuir kritéria no oráriu Asian Football Confederation (AFC).

LFTL husu ba klube hotu atu hakbesik-an ba edifisiu LFTL hodi rejista naran jogadór sira nune’e bele kompete iha liga tinan 2022 nian.

Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.

Klube 19 ne’e kompostu hosi klube primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.

Enkuantu, klube Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Nótisia relevante:  FFTL husu LFTL koopera realiza liga futeból époka 2022

Jornalista: Hortencio Sanchez

Editór      : Florencio Miranda Ximenes

Publisidade

Leave a Reply

Latest Post

error: Content is protected !!