DILI, 12 setembru 2022 (TATOLI)–Prezidente Komisaun Organizadora Dezlutu Max Stahl, Rogério Castro da Costa Cruz, informa Governu aloka osan kuaze rihun $30 ba serimónia dezlutu saudózu (jornalista) Max Stahl no Sebastião Gomes nian ne’ebé sei realiza iha 28 outubru 2022.
Notísia Relevante: KDMS informa ba SEJD kona-ba preparasaun serimónia dezlutu Max Stahl
“Ita koko tau osan kuaze rihun $30 tanba ita sei haree no halo alokasaun ba saudozu max Stahl nia espoza no oan, tanba sira mós partisipa iha serimónia ne’e,” Rogério hateten ba jornalista sira hafoin halo audiénsia ho Prezidente Konsellu Imprensa (CI, sigla portugés) iha Quintal Boot, segunda ne’e.
Nia dehan, komisaun organizadora hasoru Prezidente CI, Virgilio da Silva Guterres, hodi relata planu no programa. “Mai atu informa de’it planu no programa Saudozu Max Stahl nian ba tinan ida-nian iha loron 28, maibé atu hateten iha 28 ne’e ita sempre selebra saudozu Sabastião Gomes nian maibé loron 28 tinan ita selebra ema na’in-rua (Max Stahl no Sebastião Gomes) nian,” nia dehan.
Nune’e, komisaun organizadora tenke kria ona ekipa boot ida no sei servisu hamutuk ho ministériu sira hotu, nune’e bele haree asuntu sira-ne’e.
“Komemorasaun ba tinan ne’e sei halo diferensa uitoan tanba ema na’in-rua ona. Nune’e iha 27 outubru ne’e ita sei halo semináriu ne’ebé sei konvida oradór na’in-haat ne’ebé mak sei realiza iha salaun CNE nian. Depois lorokraik ita sei halo reflesaun no kalan sei iha animasaun iha tasi ibun Motael,” nia hateten.
Iha loron 28 outubru ne’e, sei iha misa no hafoin ida-ne’e sei halo inaugurasaun ba kampa ne’ebé Governu halo ona iha Santa Cruz.
Prezidente CI, Virgílio da Silva Guterres, hateten iha serimónia dezlutu ba saudozu na’in-rua nian ne’e sei iha pontu rua. “Ha’u hanoin maluk sira hosi sentru aúdio vizuál nian no Komisaun Organizadora ba serimónia dezlutu Max Stahl nian ne’e iha pontu rua mak sira hato’o. Ida mak prosesu rekoñesimentu ba jornalista sira, depois oinsá envolvimentu CI nian atu garante kobertura ne’ebé sufisiente ba prosesu komemorasaun dezlutu nian ne’ebé inkorpora ho komemorasaun 12 novembru. Hahú kedas hosi outubru tesik mai,” nia dehan.
Tan ne’e, CI nia kompromisu mak sei lansa premiu jornalizmu ho naran jornalista sira-nian no prémiu jornalismu ne’e atu tau matebian Max Stahl nia naran ne’ebé lansa no públika ona iha Jornál Repúblika kona-ba obra dokumentasaun áudio vizuál.
Jornalista : Osória Marques
Editór : Cancio Ximenes
