DESPORTU, DILI, HEADLINE

SEJD mantein aloka rihun $200 hodi realiza liga futeból Timorense

SEJD mantein aloka rihun $200 hodi realiza liga futeból Timorense

Sekretáriu Estadu Juventude no Desportu (SEJD), Abrão Saldanha. Imajen Tatoli/Egas Cristovão

DILI, 14 setembru 2022 (TATOLI)— Governu liuhosi Sekretáriu Estadu Juventude Desportu (SEJD), Abrão Saldanha, kuarta ne’e, hala’o audénsia ho Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hodi ko’alia kona-ba  fundu atubele organiza Liga Futeból Timorense époka 2022-2023.

Iha biban ne’e, Sekretáriu Estadu Juventude no Desportu (SEJD), Abrão Saldanha, hateten Governu liuhosi SEJD mantein aloka fundu ho montante $200.000, hodi realiza liga époka 2022-2023.

Notísia relevante: FFTL no LFTL enfrenta problema finanseiru realiza liga futeból époka 2022-2023

“Governu nia pozisaun mak ne’e, matein nafatin apoia fundu $200.000.  Governu mós deside sei la aumenta tan subsídiu ba kada klube futeból sira tanba subsidiu ne’e Governu mak inisia, ho obejtivu hahú ho subsídiu atu redús neneik hodi klube sira finansia nia aan-rasik, la’ós subsídiu ne’e atu aumenta fali,” dehan Abrão ba Jornalista-sira iha edifisiu SEJD, kuarta ne’e.

Maske, Governu liuhosi Sekretáriu Estadu Juventude no Desportu (SEJD) aloka orsamentu $200,000, hosi Federasaun Futeból Timor Leste (FFTL) $200,000 no LFTL mós iha fundu purvolta rihun $140, maibé la sufisente nafatin hodi realiza Liga époka ne’e.

Orsamentu la sufisente, tanba klube iha primeira divizaun hakarak hasa’e subsídiu liga timorense hosi $20.000 ba $40.000 no segundu divizaun hakarak subsídiu antes ne’e $10.000 hasa’e ba $20.000. Nune’e tuir kalku presiza tan orsamentu ho montante purvolta $500.000 atubele kompleta to’o $100.000-resin hodi finansia nesesidade tomak liga nian.

Tanba ne’e, SEJD husu ba klube futeból sira ne’ebé hakarak joga iha Liga Timorense kontinua kolabora hodi joga nafatin no klube sira ne’ebé mak hakarak aumenta subsídiu, bele hein tempu ruma osan barak mak bele joga fali.

“Klube balun ne’ebé hakarak joga ho mantein subsídiu, bele partisipa joga nafatin, ba klube balun ne’ebé mak hanoin katak subsídiu ne’e la-to’o, entaun hein fali tempu ruma bainhira osan iha barak ona mak sira joga fali,” SEJD sujere.

Nune’e, SEJD Abrão enkoraja FFTL no LFTL atu kontinua realiza liga futeból, hodi konvida de’it klube futeból sira ne’ebé hakarak partisipa sein aumenta subsídiu.

Prezidente FFTL, Francisco Martins da Costa Jerónimo. Imajen Tatoli/Francisco Sony

Iha Biban hanesan, Prezidente FFTL, Francisco Martins da Costa Pereira Jerónimo, informa FFTL mós aloka fundu $200.000 hodi aumenta fundu hosi Governu sa’e on aba $400.000.

“Osan ne’ebé FFTL tau mak $200.000 no atu dehan aumenta tan mós la’e, tanba iha diskusaun dehan kedan katak ami-nian mak ne’e, hanesan órgaun ne’ebé organiza liga futeból mak jere no organiza,” nia afirma.

Nia dehan antes ne’e enkontru ho parte LFTL, maibe orsamentu la-to’o no deside husu ajuda ba Governu atu aumenta, maibé Governu mantein nia desizaun ho osan ne’ebé apoia ona.

“Ita ko’alia ho Governu, maibé Governu nia pozisaun nafatin tanba ne’e desizaun ne’ebé Governu foti, Federasaun mós mantein nafatin ho nia pozisaun. Nune’e ha’u sei ko’alia fali ho LFTL atu oinsá bele rezolve fali problema ne’e, maibé bola tenke iha nafatin, sé la’ós liga mós tenke iha dalan seluk ne’ebé tenke halo,” katak nia.

Entretantu, Klube futebol 19 ne’e,  kompostu hosi klube primeira divizaun  mak AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.

Enkuantu, klube Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Nótisia relevante:  FFTL husu LFTL koopera realiza liga futeból époka 2022

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!