DILI, 15 setembru 2022 (TATOLI)—Prezidente Repúblika (PR), José Ramos Horta, hateten vizita ró kruzeiru Le Lapérouse hosi Austrália lori turista vizita Timor-Leste hanesan promosaun ida ba turizmu Timor-Leste nian.
Notísia Relevante: Ró kruzeiru Le Lapérouse hosi Austrália lori turista to’o ona Dili
“Ne’e di’ak tebe-tebes hanesan promosaun boot ba Timor-Leste ema hosi nasionalidade lubuk ida barak liu Austrália, França, balun España sira hotu-hotu kontente loos no sira hateten ba ha’u katak sira ba iha li’ur ko’alia ho populasaun no joven sira simpatiku, sira kontente loos,” PR Horta hateten ba jornalista sira hafoin hala’o vizita ba ró kruzeiru Le Lapérouse iha Portu Dili, kinta ne’e.
Xefe Estadu hateten, hafoin ne’e turista sira sei fila no nia parte sei ko’alia ho sira atu mai nafatin.
“Tanba ho esperiénsia pozitivu, nune’e sira hateten sei mai fali no ida-ne’e di’ak ba ita-nia turizmu tanba ne’e hanesan promosaun ida. Sira mai iha ne’e haree buat hotu, populasaun no joven di’ak loos no labarik sira la’o iha luron avontade laiha problema no seguru, ne’ebé sira admira loos,” Horta haktuir.
Durante vizita iha ró kruzeiru PR partila mós turista sira kona-ba situasaun Timor-Leste nian.
“Ohin, iha ró laran ha’u ko’alia ho sira lubuk ida liu-liu esplika ba sira realidade Timor nian laiha violénsia polítika, laiha violénsia etniku, laiha deskrimasaun kontra relijiaun maske Timor kuaze 98% katóliku, esplika mós ba sira kona-ba ita-nia fundu soberanu, ekonómia, no COVID-19 kuaze impaktu ba Timor,” nia dehan.
Ramos Horta hateten, turista sira-ne’ebé mai vizita Timor-Leste ne’e sira mesak simpatia ba populasaun Timor-Leste no hakarak tebes Timor-Leste nia kafé.
“Ha’u hateten mós ba sira sosa kafé no hemu kafé Timor, ne’ebé sira hotu-hotu simpatia,” nia hateten.
Jornalista : Nelson de Sousa
Editór : Cancio Ximenes
