DESPORTU, DILI

Hametin amizade, Feminina F-FDTL no AFAMA realiza jogu futsal

Hametin amizade, Feminina F-FDTL no AFAMA realiza jogu futsal

Imajen/Geoogle

DILI, 19 setembru 2022 (TATOLI)— Asosiasaun Ami Família Militár Asu’ain (AFAMA) no Femenina FALINTIL-Forsa Defeza Timor-Leste (F-FDTL), hahú loke rejistrasaun klube futsál atu hametin amizade entre juventude no F-FDTL.

Prezidente AFAMA, Rosa Maria Quintão husu ba joven hotu ne’ebé iha interese bele hamutuk ho femenina F-FDTL sira hotu bele envolve aan iha eventu ne’e atubele hametin liután lasu amizade.

“Ami hakarak kria eventu ida ne’e ba juventude hosi F-FDTL nia laran no juventude sira iha li’ur hodi anima sira liuhosi eventu ida ne’e. Ami-nia organizasaun ne’e hala’o ona, maibé entre AFAMA no F-FDTL sira de’it, nune’e iha biban ida ne’e AFAMA hakarak hateten ba públiku katak AFAMA hakarak tebes atrai no dada ita-nia juventude sira atu sira bele mai tuir eventu ida ne’e,” dehan Rosa liu hosi konferensia imprensa ne’ebé halao iha Farol Dili, segunda ne’e.

Eventu ne’e  hanesan atividade dahuluk ne’ebé AFAMA hala’o ho Feminina F-FDTL iha tinan ida ne’e. Atividade ne’e loke ho nia objetivu prinsipál kria pás no amizade entre joven hotu ho F-FDTL no labele hamosu violénsia entre joven sira.

Iha biban ne’e, Tenente Marquita da Cunha hanesan responsavél feminina F-FDTL mós  informa, eventu ne’e loke ba públiku atu ema hotu bele kompete.

“Iha ne’e, ha’u lori Feminina F-FDTL-nia naran, ami hamutuk ho AFAMA atu realiza eventu ida ne’e no eventu ida ne’e loke ba públiku ba ita-nia juventude foinsa’e feto no mane no nível Ministeriu sira hotu ne’ebé mak  interesante ba iha jogu ida ne’e,  ami konvida ita bo’ot sira hotu atu mai hola parte iha jogu ida ne’e,” dehan Tenente ne’e.

Entretantu, komisaun organizadór ba programa refere hosi parte Juventude Hadomi Desportu haforsa teknikamente no iha jogu ne’e planu atu loke ba ekipa hamutuk 64, ba feto no mane.

Jogu ne’e nu’udar projetu pilotu, nakloke ba públiku iha Timor laran tomak. Daudaun faze inskrisaun.

Jogu ne’e média kompetisaun ka “stengah kompetisi” ne’e iha faze lima ne’ebé jogadór sira sei liu mak hanesan, faze apuramentu, faze eliminasaun, faze oitavu finál, semí-finál hafoin ba finál.

Orsamentu ba rejistarasun ekipa ne’ebé hakarak joga $100, ba inskrisaun, $50 ba tratamentu ruma ka parte garante karik iha téknika ruma iha jogu ne’e mak akontese buat ruma bele utiliza osan refere.

Kona-ba prémiu téknikamente sei prepara no kompetisaun ne’e hala’o iha kampu F-FDTL Fatuhada Dili.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!