iklan

EDUKASAUN, BOBONARO, HEADLINE, MUNISÍPIU

Edukasaun Bobonaro sei konsulta ho PAM kona-bá kondisaun EBF Piron

Edukasaun Bobonaro sei konsulta ho PAM kona-bá kondisaun EBF Piron

Kondisaun Ensinu Báziku Filiál (EBF) Piron, suku Lontas, postu Administrativu Lolotoe, munisípiu Bobonaro. Imajen espesiál.

BOBONARO, 20 setembru 2022 (TATOLI)-Diretór Servisu Edukasaun Munisípiu Bobonaro,Crispim Lopes Moniz, sei konsulta ho Presidente Autóridade munisípiu (PAM) Bobonaro, Ernesto de Oliveira Barreto no Ministru Edukasaun Juventude  no Desportu (MEJD), Armindo Maia, hodi solusiona kondisaun infraestrutura Ensinu Báziku Filiál (EBF) Piron, suku Lontas, postu Administrativu Lolotoe.

Problema eskola refere enfrenta, Edukasaun Bobonaro aprezenta ona ba MEJD iha tinan kotuk no tuir informasaun tama ona planu prioridade atu rezolve iha tinan 2023, maibé presiza aprezenta fila-fali informasaun adisionál balun tanba dadaun númeru esdutante ne’ebé tuir hela prosesu aprendizajen iha EBF Piron menus kada tinan.

Notísia relevante: EBF foun tolu iha Atabae-Balibo sei inaugura iha setembru

Moniz relata, iha tinan hirak liubá iha estudante na’in-60 tún ba 40 no agora daudaun ne’e iha de’it alunu 27, hosi klase primeiru-anu to’o kuartu-anu.

“Ami presiza aprezenta informasaun hirak ne’e ba señor Ministru no mos Prezidente Autoridade munisipál, depois atu tetu took ita har’ii edifísiu eskolár permanente iha Piron, depois ami bele hetan desizaun ne’ebé klaru,” nia imforma ba Jornalista sira iha kna’ar fatin, Maliana, segunda ne’e.

Maibé Crispim observa populasaun iha aldeia Piron natoon de’it, tanba ne’e nia  sujere di’akliu muda fali estudante EBF Piron ba eskola Ensinu Bazíku Sentrál (EBC, sigal Portugues), suku Lebos, tanba jeografikamente distànsia serka metru 400 de’it.

“Hanesan ha’u temi tiha ona, bainhira ita harii edifísiu eskola permanente ida iha ne’ebá, alunu ne’e tún beibeik depois ikus mai karik laiha ema mak kontinua eskola iha-ne’ebá, entaun edifísiu ne’e ita atu halo nusá,” nia fó hanoin.

Realsiona ho informasaun ne’ebé espalla iha mídia sosiál facebook dehan servisu edukasaun munisípiu Bobonaro la halo monitorizasaun ba problema eskola sira estabelese iha munisípiu ne’e enfrenta.

Diretór Crispim klarifika, iha tinan kotuk Edukasaun Bobonaro konsege halo enkontru regulár ho dirijenete eskola públiku no privada sira hotu hodi ko’alia liu asntu importante sira, kona-bá infraestrutura, kurríkulu, rekursu umanu no jestaun administrasaun no finansa.

“Agora iha enkontru ida-ne’e diretór sira bele iha posiblidade hato’o sira-nia preokupasaun, ami hetan informasaun sira-ne’e ami rekapítulu depois manda mensajen sira-ne’e ba nasionál,” Nia katak.

Nia dehan, serbisu edukasaun munisípiu Bobonaro durante ne’e preokupa kona-bá dezenvolvimentu infraestrutura edukativa, tanba ne’e mak Governu Austrália konsege apoia konstrui eskola EBF neen implementa iha postu administrativu Balibo no Atabae.

Nune’e mós Embaxada Japaun iha Timor-Leste liuhosi  Japan International Cooperation Agency (JICA) mós apoia konstrusaun eskola foun ne’ebé implementa iha postu administrativu Bobonaro hamutuk rua, ida iha Tai-Mea konklui ona konstrusaun no ida seluk iha Anapal.

Alende ne’e iha tinan 2021 munisípiu Bobonaro mos hetan Apoia hosi MEJD hodi konstrui no reablita infrastrutura edukativa hamutuk 21 liuhosi projetu ho karáter komunitária ne’ebé lansa iha fulan-janeiru tinan 2022 no daudaun adamentu projetu la’o hela.

Enkuantu, Ministériu Edukasaun Juventude no Desportu (MEJD) prevee $2,409.512,03 iha tinan ne’e,  konstrui no reabilita eskola hamutuk 21 ho sala aula 76 iha munisípiu Bobonaro, ne’ebé tama iha projetu komunitária.

Entretantu, eskola 21 iha Bobonaro ne’ebé tama projetu komunitária mak hanesan EPE Atu-Aben, EPE Rita-bou, EPE Holsa, EBC Gumer, EBC Hauba, EBF Dilai.

Nune’e mós EBF Kota Boot, EBF Mazop, EBF Odelgomo, EBF Oplegul, EBF Boloi, EBF Cara-bau, EBF Ana-pal, EBF Maliubu, EBF Ferik Katuas, EBF Molop-Taz, EBF Opa Vila, EBF Halekou,  EBF Rairobo, ESJ Númeru I Maliana no  EBF 12 Abríl Março.

Alende ne’e MEJD mos foin lalais apoia materiál konstrusaun  EBF Foun iha Badut-Mean suku Cowa,postu Administrativu Balibo ne’ebé nia konstrusaun Remata ona no EBF ida iha Mole-alan suku Ritabou ne’ebé prosesu konstrusaun sei hahú iha tempu badak.

Tuir dadus munisípiu Bobonaro daudaun ne’e iha ensinu bázika filiál (EBF) hamutuk 112, ensinu bázika sentrál (EBC, sigla portugés) 30, ensinu sekundáriu jerál (ESG, sigla portugés) hitu no ensinu tékniku vokasionál (TEKVOK) hamutuk ualu.

Notísia relevante:DNASE apoiu materiál emerjénsia ba EBF rua iha Bobonaru

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!